Türkmenistanda döwlet emlägini ynançly dolandyrmaga bermegiň tertibi tassyklanyldy
Türkmenistanyň prezidenti karara gol çekdi, resminama laýyklykda döwlet emlägini bäsleşik esasynda ynançly dolandyrmaga bermegiň Tertibi tassyklanyldy.
Resminama 2021-nji ýylyň noýabr aýynda kabul edilen “Döwlet emlägini ynançly dolandyrmak hakynda” Kanuna esaslanandyr hem-de döwlet emlägini dolandyrmagyň netijeliligini we girdejililigini ýokarlandyrmaga, döwletiň ykdysadyýetine içerki we daşarky maýa goýumlary çekmäge, döwlet emläginiň maliýe ýagdaýyny sagdynlaşdyrmaga hem-de olaryň dolandyrylyşyny kämilleşdirmäge gönükdirilendir.
Agzalan kanunyň 4-nji maddasyna laýyklykda, onuň hereket ediş çygry hojalyk we paýdarlar jemgyýetleriniň paýlaryna hem-de paýnamalaryna, strategik maksaly emläklerden başga döwlet kärhanalaryna we olaryň emläklerine degişlidir.
Kanun nebit işleri hem-de hukuk düzgün-tertibini, döwletiň goranyş ukyplylygyny we howpsuzlygyny üpjün etmek bilen baglanyşykly işler babatda ulanylmaýar.
Mundan başga-da, kärhananyň tehnologik tapgyrly işini bozýan önümçilik we önümçilik däl bölümler hem-de düzümleýin birlikler görnüşindäki döwlet emlägi ynançly dolandyrmaga berilmeýär.
ORIENT news
