ÝTÖB zenan telekeçiler üçin işewürlik ulgamyny gurmak boýunça okuw sapaklaryny geçirýär
Ýewropanyň Täzeleniş we ösüş banky Türkmenistanyň zenan telekeçileri, şeýle hem ýokary we orta ýolbaşçylar üçin «Işewür zenanlar» başlangyjynyň esasynda «El bilen dolandyrmakdan ulgamlaýyn işewürlige nädip geçmeli?» atly onlaýn okuw sapagyny geçirer.
Bu okuw sapagy gatnaşyjylara telekeçilik işiniň «elbilen» dolandyrylma düzgüninden onuň ulgamlaýyn dolandyrylyşyna geçmäge kömek etmelidir, şunda işiň her bir düzüm bölegi tapawutlandyrylýar, derňelýär weöz-özi hereket edýän derejede ýola goýulýar. Guramaçylar sapaklara gatnaşyjylaryň telekeçiligi dolandyrmagy üýtgedip gurmakda aýratyn hünär kömegini aljakdyklaryna ynam bildirdiler.
Ýewropa Bileleşigi tarapyndan maliýeleşdirilýän tölegsiz bu onlaýn okuwy 2022-nji ýylyň dekabrynyň birinji ýarymynda geçiriler. Okuw sapagyna gatnaşyjylaryň sany çäkli bolup, ol saýlama bäsdeşlik esasynda saýlanyp alnar.
Çärä gatnaşmak üçin anketanyň doldurylan görnüşi 2022-nji ýylyň 21-nji noýabryndan gijä galman e-poçta arkaly şu salga ovezovat@ebrd.com iberilmelidir.
ORIENT news
Surat: redaksiýa arhiwi
