AÖB-nyň hünärmenleri Türkmenistanyň Döwlet daşary ykdysady iş bankynyň işgärleri üçin okuw sapaklaryny geçirdiler
Aziýa ösüş bankynyň hünärmenleri Türkmenistanyň Döwlet daşary ykdysady iş bankynyň işgärleri üçin kiçi we orta telekeçilere karz bermek, şeýle hem pul serişdelerinden hyýanatçylykly peýdalanmaklyga, terrorçylygy maliýeleşdirmeklige we köpçülikleýin gyryş ýaraglarynyň ýaýramagyna garşy göreşmek bilen baglanyşykly okuw sapaklaryny geçirdi.
Aziýa Ösüş Bankynyň karzlar bölüminiň baş hünärmeni Kairat Şalabaý, kiçi we orta telekeçilerekarz bermek barada netijä gelmekdäki töwekgelçiligi kesgitlemek boýunça okuw sapagyny geçirdi.
Okuwyň dowamynda gatnaşyjylar kompaniýalaryň iş meýilnamalaryna nähili baha bermelidigini, taslamalara maliýe seljermesini geçirmegi, şeýle hem Aziýa ösüş bankynyň halkara tejribesine esaslanýan kiçi we orta telekeçilere karz bermegiň beýleki aýratynlyklaryny öwrendiler. Şeýle hem bank pudagynda marketing gurallaryna aýratyn üns berildi.
AÖB-nyň geňeşçisi Muhammet Jüneýit Yunus Gori, Türkmenistanyň Döwlet daşary ykdysady iş bankynyň hünärmenleri üçin ýöriteleşdirilen okuw sapagynda töwekgelçiligi kesgitlemek we bikanun ýol bilen alnan girdejileriň kanunlaşdyrylmagyna garşy göreşmek boýunça, şeýle hem pul serişdelerinden hyýanatçylykly peýdalanmagyň we terrorçylygy maliýeleşdirmegiň öňüni alyş çäreleri, şeýle hem bu ugurdaky halkara hukuk resminamalary barada çykyş etdi.
Umuman aýdylanda, Aziýa ösüş bankynyň wekilleri tarapyndan geçirilen okuwlar, Türkmenistanyň Döwlet daşary ykdysady iş bankynyň işgärleriniň hünärlerini ýokarlandyrmaga we bankyň berýän hyzmatlary arkaly Türkmenistanda kiçi we orta telekeçiligi ösdürmäge gönükdirilendir.
ORIENT news
Surat: redaksiýanyň arhiwinden
