Türkmenistanda pagta ýygymy tamamlanyp barýar we Hasyl baýramyny bellemäge taýýarlanylýar
Duşenbe güni prezident Serdar Berdimuhamedow welaýatlaryň häkimleri hem-de obasenagat toplumy boýunça wise-premýer Annageldi Ýazmyradow bilen sanly ulgam arkaly geçiren iş maslahatynda Türkmenistanda pagta ýygymy möwsüminiň we bugdaý ekişiniň tamamlaýjy tapgyrynyň barşy baradaky, ekerançylaryň häzirki günlerde alyp barýan beýleki işlerine degişli meseleleri ara alyp maslahatlaşdy.
Ýurt boýunça oba hojalyk möwsümleriniň depginleri, şol sanda geljekki hasylyň düýbüni tutmak boýunça güýzlük bugdaý ekişiniň hem-de pagta ýygymynyň görkezijileri, meýdanlarda tehniklaryň netijeli ulanylyşy, “ak altynyň” daşalyşy we kabul ediş harmanhanalaryň işleri barada hasabat berildi.
Mundan başga-da, Daşoguz we Lebap welaýatlarynda şaly ýygnamak işleri alnyp barylýar, Mary welaýatynyň ekerançylarynyň durmuşynda hem gyzgalaňly möwsüm barýar, ol ýerde ösdürilip ýetişdirilen gant şugundury ýygylýar.
Şeýle hem Serdar Berdimuhamedow içerki bazaryň ýurdumyzda öndürilen ekerançylyk önümleri, şol sanda ýeralma hem-de beýleki gök önümler bilen üpjün edilişini gözegçilikde saklamak barada görkezme berdi.
Şonuň bilen birlikde, ýurtda noýabr aýynyň ikinji ýekşenbesinde bellenilýän we güýzki ýygym möwsüminiň tamamlanýandygyny alamatlandyrýan Hasyl baýramyny bellemäge taýýarlyk görülýär. Baýramçylykda ekerançylar, ýer eýeleri alym-agronomlar hem-de OST-niň beýleki hünärmenleri sylaglanylýarlar, olara çeken zähmeti üçin sylaglar we sowgatlar gowşurylýar, sergiler, konsertler hem-de beýleki dabaraly çäreler guralýar.
ORIENT news
