Türkmenistanyň Änew şäheri 2024-nji ýyl üçin türki dünýäsiniň medeni paýtagty diýlip yglan edildi
Türkmenistanyň taryhy Änew şäheri 2024-nji ýyl üçin türki dünýäsiniň medeni paýtagty diýlip yglan edildi. Şeýle çözgüt türki dünýäsiniň 2022-nji ýylda medeni paýtagty bolan Bursa şeherinde geçirilen TÜRKSOÝ-yň medeniýet ministrleriniň hemişelik geňeşiniň 39-njy mejlisinde kabul edildi. Duşuşygyň jemleýji jarnamasyna Türkmenistanyň medeniýet ministri Atageldi Şamyradow bilen birlikde, agza ýurtlaryň edaralarynyň ýolbaşçylary gol çekdiler.
Şeýle hem Jarnamada Türkiýe Respublikasynyň hökümeti tarapyndan guralýan TEKNOFEST – awiasiýa, kosmos we tehnologiýalar festiwalynda Medeniýet ministrlikleriň hem-de ýokary okuw mekdepleriň ýolbaşçylygynda bilelikdäki taslamalary işläp düzmek arkaly türki dilli ýurtlaryň ýaşlarynyň gatnaşmagyny üpjün etmek baradaky çözgüt bellenildi.
Mundan başga-da, TÜRKSOÝ-yň medeniýet ministrleriniň hemişelik geňeşi türki dünýäsiniň Medeniýet we hakyda ýylyny yglan etmek hakyndaky taslamany öňe ilerletmek maksady bilen, şäreleri geçirmek barada çözgüt kabul etdi.
Jemleýji Jarnamada TÜRKSOÝ-yň işiniň netijeliligini ýokarlandyrmak maksady bilen, agza ýurtlaryň medeniýet ministrlikleriniň we degişli edaralarynyň wekilleriniň gatnaşmagynda utgaşdyryjy ýurt tarapyndan guralýan TÜRKSOÝ-yň baş sekretariatynda ýylda iki gezek ýokary wezipeli döwlet gullukçylarynyň iş maslahatyny geçirmek barada karara gelnendigi görkezildi.
Şeýle hem resminamada 2023-nji ýylda TÜRKSOÝ-yň döredilmeginiň 30 ýyllygy mynasybetli agza ýurtlarda, ÝUNESKO, Ýewropa Geňeşi, BMG ýaly halkara guramalarynda hem-de dünýäniň möhüm medeni merkezlerinde dabaralaryň guraljakdygy bellenildi. TÜRKSOÝ-a agza ýurtlaryň ÝUNESKO-nyň işleri boýunça milli komissiýalary ÝUNESKO tarapyndan Türki dilleriň halkara gününiň yglan edilmegi boýunça işleri alyp barýarlar.
Türki dünýäsiniň 2021-nji we 2022-nji ýyllarda üstünlikli geçirilen “Gorkut Ata” festiwaly bolsa TÜRKSOÝ-yň däbe öwürlen maksatnamasyna girer hem-de türki dünýäsiniň medeni-paýtagt şäherlerinde gezekli gezegine geçiriler.
TÜRKSOÝ-yň medeniýet ministrleriniň hemişelik geňeşiniň 40-njy mejlisi türki dünýäsiniň 2023-nji ýylda paýtagty boljak Azerbaýjanyň Şuşe şäherinde indiki ýylyň ahyrynda geçiriler.
ORIENT news
