Türkmenistanyň makroykdysady görkezijileri durnukly depgini saklaýar
Ýylyň geçen 10 aýynda Türkmenistanyň JIÖ-niň ösüşi 6,2% derejesinde saklanýar. Şu döwürde ýurtda durmuş we önümçilik maksatly iri desgalaryň 60-dan gowragy ulanylmaga berildi.
Anna güni sanly ulgam arkaly geçirilen hökümetiň mejlisinde Türkmenistanyň durmuş-ykdysady ösüşiniň netijeleri jemlenilip, esasy görkezijiler beýan edildi.
Hususan-da, 2021-nji ýylyň degişli döwri bilen deňeşdirilende, ýanwar-oktýabr aýlarynda ýurtda öndürilen önümleriň möçberi 10,9% ýokarlandy.
Bölek haryt dolanyşygy 10,5% artdy, daşary söwdanyň möçberi bolsa geçen ýylyň 10 aýynyň döwründäki derejesinden 39%-den gowrak ýokary boldy.
Prezident Serdar Berdimuhamedow ýurdumyzda öndürilýän önümleriň görnüşlerini hem-de onuň eksportuny giňeltmekden ugur alyp, ykdysady taýdan diwersifikasiýalaşdyrmak işini dowam etmegiň zerurdygyny belledi.
ORIENT news
