Ahalda üzüm nahallaryny oturtmak kampaniýasy dünýä rekordyna dalaş edýär
Türkmenistanyň Ahal welaýatynda anna güni irden üzüm nahallaryny oturtmak kampaniýasy geçirildi. Täze üzümçiligiň düýbüni tutmak "Organiki bakjalyk we onuň ekologiýa goşýan goşandy" atly okuw maslahatyndan soň geçirildi we dünýä tejribesinde deňi-taýy bolmadyk durmuş-bilim çäresine öwrüldi. Şonuň üçin-de, Türkmen döwlet telewideniýesiniň “Watan” habarlar gepleşiginde habar berlişi ýaly, ol Ginnesiň rekordlar kitabyna girizilmegine dalaş edýär.
Bütindünýä rekordlary guramak boýunça geňeşçi Aýdyň Türkgüjiniň gatnaşmagynda geçirilen okuw maslahaty Oba hojalyk we daşky gurşawy goramak ministrliginiň, ýerli häkimýetleriň wekillerini, daýhanlary we ÝOM-niň talyplaryny - jemi 500-den gowrak adamy ýygnady.
Ozal Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň Aýdyň Türkgüji bilen duşuşygynda okuw maslahatynyň guramaçylyk işleriniň gidişi ara alnyp maslahatlaşylypdy.
Milli habarlar gullugynyň habarlar gepleşiginde Ahala eden saparlarynyň birinde bu ugurda täze dolandyryş merkeziniň gurluşygyna hut özi gözegçilik edýän we ekologik jähtine aýratyn üns berýän Gurbanguly Berdimuhamedowyň bu ýerde ýerleşýän synag meýdançasynda çykarylan üzümiň täze sortuna at berendigi bellenildi. Şeýlelik bilen, üzümçilikden uzak bolmadyk ýerde ýerleşýän obanyň ady boýunça üzümiň “kärzek” görnüşi ýüze çykdy.
ORIENT news
