“Tatneft” Aşgabat sergisinde öz ösüşlerini görkezýär
“Tatneft” kompaniýasy iri senagat forumynyň – OGT-2022-niň çäginde çarşenbe güni açylan Aşgabat nebit-gaz sergisine gatnaşdy.
Bu sergi uglewodorodlary çykarmak, daşamak we gaýtadan işlemek, nebithimiýa, gaz himiýasy we ugurdaş nebit gazyny ýok etmek (utilizirlemek) taýdan ýeten sepgitlerini, şeýle hem, ylmy taýdan çuňňur tehnologiýalary ulanmak arkaly, iň täze enjamlary, geljegi uly bolan senagat işläp taýýarlamalaryny hödürleýän öňdebaryjy türkmen we daşary ýurt kompaniýalarynyň 50-den gowragyny bir ýere üýşürdi.
Türkmenistanyň ygtybarly we uzakmöhletli hyzmatdaşy hökmünde, Tatarstan kompaniýasy sergide ýataklary özleşdirmek, gatlaklaryň önüm berijiligini we nebit önümçiligini ýokarlandyrmak boýunça öz mümkinçiliklerini görkezdi.
“Tatneft” Türkmenistanda “Türkmennebit” bilen şertnama esasynda 2010-njy ýyldan bäri işleýär. Bu döwürde kompaniýa 230 guýudaky işleri tamamlady. 2022-nji ýylda günbatar Türkmenistanyň Goturdepe ýatagynda azyndan 550 nebit guýusynda bolan hyzmatlaryň ýerine ýetirilmegi barada goşmaça şertnama gol çekildi. Russiýanyň bu kompaniýasy, şeýle hem nebit senagaty enjamlaryny, nasos-kompressor turbalaryny abatlamak işini gurnaýar.
– Geljekde “Turkmennebit” bilen hyzmatdaşlygymyz geologiki we geodeziki gözlegleri, nebit önümçiligini güýçlendirmek, önümçilik prosesinde adam faktorynyň täsirini azaltmak üçin önümçilik desgalaryny sanlaşdyrmak we awtomatlaşdyrmak taslamalary öz içine alýar – diýip, “Tatneft” kompaniýasynyň wekili Damir Kamiliýew ORIENT-iň habarçysy bilen geçirilen söhbetdeşlikde aýtdy.
ORIENT news
