Türkiýe türkmen tebigy gazyny Ýewropa üstaşyr geçirmäge taýýardygyny mälim etdi
Anadolu habar gullugynyň habar bermegine görä, Türkiýäniň Energetika we tebigy baýlyklar ministri Fatih Dönmez, Türkiýe türkmen tebigy gazyny Ýewropa bazarlaryna geçirmäge we munuň üçin mümkin bolan ähli zady ýerine ýetirmäge taýýardygyny Berlinde geçirilen IV Türk-German Energetika Forumynda aýtdy.
Ministr Günorta-Gündogar Ýewropanyň köp ýurtlarynyň gaz zerurlyklaryny kanagatlandyrmak üçin Türkiýe bilen aragatnaşyk saklaýandygyny aýtdy we ýakyn ýurtlara energiýa çeşmelerini üstaşyr geçirmekde öz ýurdunyň möhüm orun eýeleýändigini beýan etdi.
Anadolu habar gullugynyň habar bermegine görä, häzirki wagtda Türkiýe Hazar sebitiniň we Gündogar Ortaýer deňziniň Ýewropa ugrundaky tebigy baýlyklarynyň üstaşyr geçirilmegi bilen baglanyşykly mümkin bolan ähli zady etmek üçin işjeň hereket edýär. Bu esasanam Türkmenistanyň, Yragyň we beýleki ýurtlaryň tebigy gazyny üstaşyr geçirmäge gönükdirilendir.
ORIENT news
Surat: haberchannel.com
