Ahalyň täze merkezinde metjit gurmak üçin ýer kesgitlenildi
Türkmen parlamentiniň ýokary palatasynyň Başlygy Gurbanguly Berdimuhamedow çarşenbe güni Ahal welaýatynyň gurulýan dolandyryş merkeziniň çäklerine geldi hem-de täze şäheriň häkimi Şamuhammet Durdylyýew we sebit merkezini gurmak baradaky Döwlet komitetiniň ýolbaşçysy Derýageldi Orazow bilen metjit gurmak üçin ýer kesgitledi.
Gurbanguly Berdimuhamedow guruljak metjidiň binagärlik taslamalarynyň görnüşleri, onuň daşky hem-de içki bezegleriniň şekilleri, ýanaşyk ýerleriniň meýilleşdirilişi bilen tanyşdy. Bu baradaky wideoreportaž türkmen teleýaýlymlarynyň täzelikleriniň agşamky goýberilişinde görkezildi.
Halk Maslahatynyň Başlygy metjidi gurmagyň käbir meseleleri boýunça din wekilleri we ýaşulylar bilen maslahatlaşmagy teklip etdi hem-de umuman, adamlary ruhy taýdan özüne çekjek ýer boljak desgany ýokary hilli bina etmek boýunça görkezmeleri berdi.
Ýolbaşçylar bilen söhbetdeşlikde Gurbanguly Berdimuhamedow ýakynda türkmen wekilýetiniň Tokio bolan iş saparyny ýatlap, täze dolandyryş merkezinde şähergurluşyk ulgamynda hem-de ýokary tehnologiýalar ulanmak arkaly durmuş gurşawyny guramakda Ýaponiýanyň öňdebaryjy işläp taýýarlamalaryny peýdalanyp boljakdygyny belledi.
Her ýyl 6-njy oktýabrda Türkmenistanda Hatyra güni bellenilýär, 7-nji oktýabrda bolsa Metjidiň guruljak ýeriniň saýlanyp alynmagy mynasybetli toý sadakasy beriler diýip, Gurbanguly Berdimuhamedow öz maksady barada aýty hem-de haýyr-sahawat sadakasynyň ýazan kitaplarynyň galam hakynyň hasabyna guraljakdygyny habar berdi.
ORIENT news
