Ýokary okuw mekdepleriň ylmy barlaglarynyň täjirçilik ugurly bolmagy – USAID-iň okuw maslahatynyň temasy
Türkmenistanyň ýokary okuw mekdeplerinde ylmy barlaglary neneňsi täjirçilik taýdan bähbitli etmeli? Döwür bilen aýakdaş gitmek üçin okuw maksatnamalaryny neneňsi kämilleşdirmeli? Şu we beýleki sowallara Aşgabatda üç günlik halkara onlaýn-okuw maslahatynyň dowamynda jogap bermäge synanyşyldy. Okuw maslahaty Türkmenistanyň Daşary işler ministrliginiň goldaw bermeginde USAID-iň häzirki zaman hünär başarnyklaryny ösdürmek boýunça Taslamasy tarapyndan guraldy.
Çärä türkmen ýokary okuw mekdepleriniň 8-siniň, Milli bilim institutynyň, Türkmenistanyň Senagatçylar we telekeçiler birleşmesiniň ýanyndaky Telekeçilik mekdebiniň hem-de А&M (Texas A&M) Tehass uniwersiteti we Perdýu uniwersiteti ýaly meşhur okuw mekdepleri bilen birlikde, ýedi sany amerikan we ýewropa uniwersitetleriniň wekilleri gatnaşdylaar.
Okuw maslahatynyň dowamynda ýokary okuw mekdeplerinde ylmy barlaglary täjirçilik ugruna geçirmek babatda özara tejribe alyşyldy, ykdysadyýetiň dürli pudaklaryna barlag geçirmek hyzmatlaryny hödürlemek arkaly girdeji almak üçin uniwersitetleriň ylmy kuwwatyny peýdalanmagyň usullary ara alnyp malahatlaşyldy.
Ýokary okuw mekdepleriň weklleriniň pikirine görä, girdeji almagyň ýene-de bir usuly hususy we döwlet kompaniýalaryna ýokary hünär derejeli tölegli maslahaatlary bermekden, şeýle hem bilim beriş okuwlaryny we önümçilikden aýrylmazdan hünär derejesini ýokarlandyrmak boýunça okuwlary guramakdan ybaratdyr.
Ýöne, bularyň ählisi ýokary okuw mekdepleriň ykdysadyýetiň dürli pudaklary bilen ýakyn özara gatnaşygy bolmazdan mümkin däldir diýip, okuw maslahatyna gatnaşyjylar bellediler. Şeýle özara gatnaşyk diňe tölegli hyzmatlary hödürlemekde däl, eýsem institutlaryň hem-de uniwersitetleriň okuw maksatnamalaryny önümçiligiň soňky ölçeglerine we talaplaryna laýyklykda kämilleşdirmekde-de ýüze çykmalydyr.
Şeýle hem onlaýn-duşuşygyň barşynda ylmy barlaglary maliýeleşdirýän halkara guramalar we gaznalar tarapyndan uniwersitetlere hödürlenilýän mümkinçilikler barada aýdyldy. Daşary ýurtly bilermenler türkmen ýokary okuw mekdepleriniň şeýle gaznalar tarapyndan goldanylmagy hem-de geljegi uly ylmy taslamalary ýerine ýetirmegi üçin uly mümkinçilige eýedigini nygtadylar.
ORIENT news
