Türkmenistanyň hökümeti ýaş maşgalalara ýeňillikli karzlaryň möçberini artdyrdy
Hökümet ýaş maşgalalara öýlerini we ýaşaýyş şertlerini gowulandyrmak, hojalyk harytlaryny we ş.m. satyn almak üçin berilýän ýeňillikli karzlaryň möçberini artdyrdy.
Bu barada karara Prezident Serdar Berdimuhamedow anna güni gol çekdi. Bu resminama ýaş maşgalalary goldamak we olaryň ýaşaýyş-durmuş şertlerini mundan beýläk-de gowulandyrmak maksady bilen durmuşa geçirilýän döwlet çärelerini kämilleşdirmäge gönükdirilendir.
Indi olar zerur bolan öý-goşlaryny we hojalyk harytlaryny satyn almak üçin girew goýmazdan, zamunlyk esasynda ýyllyk 1 göterim bilen 3 ýyl möhlete berilýän 20 müň manada çenli karz alyp bilerler.
Ozal türkmen banklary göterim möçberi şol derejede bolan ýeňillikli karzlary 6000 manata çenli berýärdi. Ýagny, berilýän karzyň möçberi üç esseden gowrak artdy.
ORIENT news
