Putin Russiýanyň Türkmenistan bilen ykdysady hyzmatdaşlygyny giňeltmek isleýändigini mälim etdi
Russiýa Federasiýasynyň Prezidenti Wladimir Putin ŞHG sammitiniň çäginde Türkmenistanyň lideri Serdar Berdimuhamedow bilen bolan duşuşygynda: - “Russiýa Türkmenistan bilen söwda-ykdysady gatnaşyklary täze derejä çykarmak isleýär” - diýdi.
Russiýanyň lideri “Gazprom”-yň we “Tatneft”-iň türkmen hyzmatdaşlary bilen alyp barýan üstünlikli uzakmöhletli işini bellemek bilen, Türkmenistan bilen ykdysady gatnaşyklarda energetikanyň aýratyn ornuna ünsi çekdi.
Putin rus kompaniýalarynyň Türkmenistanda işlemegi üçin zerur şertleriň döredilendigi üçin Berdimuhamedowa minnetdarlyk bildirdi. RF Prezidenti Russiýanyň gatnaşmagynda ýurtda jemi 190 kärhananyň ykdysady iş alyp barýandygyny aýtdy.
– Biz ykdysady gatnaşyklarymyzy özara gatnaşyklaryň beýleki ugurlary arkaly diwersifikasiýa etmegi maksat edinýäris – diýip, Russiýanyň baştutany aýtdy. – Oba hojalygyny, dokma senagatyny göz öňünde tutýaryn. Türkmenistanyň bazaryna çig mal däl önümleriň üpjünçiligini artdyrmaga taýýardyrys.
Duşuşykda Russiýa Federasiýasynyň 60 subýektiniň Türkmenistan bilen işjeň hyzmatdaşlyk edýändigi habar berildi. Olaryň köpüsi bilen söwda-ykdysady, ylmy-tehniki we medeni ugurlarda şertnamalar baglaşyldy.
ORIENT news
Foto: Süleýman Çaryýew
