Astrahanda Hazar mediaforumda “Serhetsiz Hazar” bäsleşiginiň ýeňijileri sylaglanar
8-nji sentýabrda Astrahanda öz işine başlajak VII Halkara Hazar mediaforumyna gatnaşyjylar häzirki zamanyň media ulgamyny hem-de onuň täze durmuş-ykdysady şertlerdäki işleriniň aýratynlyklaryny ara alyp maslahatlaşarlar. Duşuşygyň maksatnamasyna pikir alyşmalar, ýüzbe-ýüz söhbetdeşlikler, ussatlyk sapaklary hem-de beýleki işewür we dynç alyş çäreler girizildi diýip, TASS habar berýär.
9-njy sentýabrda, forumyň esasy iş gününde, 10-dan gowrak işewür we beýleki duşuşyklar meýilleşdirildi. Şolaryň hatarynda “Köpçülikleýin kommunikasiýalaryň ýagdaýlary we çagyryşlary”, “Trewel-žurnalistleriniň we pikirleri öňe sürmegiň liderleriniň ligasy” diýen ýüzbe-ýüz söhbetdeşlikler, “Mazmunlar vs görnüşler” atly pikir alyşmalar, internet torlaryndaky işler barada ussatlyk sapaklary hem-de köp sanly beýleki wakalar bar. Olara Hazarýaka ýurtlarynyň habarlar agentlikleriniň ýolbaşçylary, şeýle hem RF-niň sanly ösüş, aragatnaşyk we köpçülikleýin kommunikasiýalar minstrliginiň orunbasary Bella Çerkesowa hem-de RF-niň DIM-niň maglumat we metbugat departamentiniň direktory Maria Zaharowa gatnaşarlar.
Guramaçylar çärä ýygnananlaryň meşhur žurnalistler, fotosuratçylar, blogerler, syýasatşynaslar, şeýle hem Russiýanyň we Hazar sebiti ýurtlarynyň jemgyýetçilik guramalarynyň liderleri bilen gönüden-göni gürrüňdeş bolmaga mümkinçilik alarlar. Mediaforumyň saýtynda Russiýanyň 17 sebitinden hem-de ýurtlaryň altysyndan gatnaşjaklaryň 300-den gowragy bellige alyndy. Şolaryň hatarynda dürli ýurtlaryň iri KHBS-leriniň 50-den gowragynyň baş redaktorlary we ýolbaşçylary bar.
Şeýle hem 9-njy sentýabrda mediaforumyň çäklerinde “Serhetsiz Hazar” diýen iň oňat žurnalistik iş üçin bäsleşigiň ýeňijilerini sylaglamak dabarasy geçiriler. Bu bäsleşik birnäçe: “Hazaryň fotosuraty”, “Adam we deňiz”, “Hazaryň ýurtlaryny açyp”, “Hazar – saglygyň çäkleri”, “Täze garaýyş” diýen ugurlar boýunça geçirildi. Şu ýyl döredijilik bäsleşigine gatnaşmaga Azerbaýjandan, Gazagystandan, Russiýadan we Türkmenistandan adamlaryň 43-si isleglerini beýan etdiler. Olar 162 sany işleri arkaly gatnaşmak üçin 113 sany haýyşnama berdiler.
ORIENT saýtynyň žurnalisti hem ýaryşa gatnaşyp, finala çykanlaryň hataryna düşdi. 9-njy sentýabrda bäsleşigiň eminleri ýeňijileriň atlaryny yglan ederler hem-de olaryň arasynda orunlary paýlarlar.
Forumy geçirmek pikiri 2014-nji ýylda Hazar deňzi ýurtlarynyň “bäşliginiň” – RF-niň, Gazagystanyň, Azerbaýjanyň, Eýranyň, Türkmenistanyň sammitinde peýda boldy, ol ilkinji gezek 2015-nji ýylda Astrahanda geçirildi. Forumyň geçirilýän döwrüniň dowamynda Astrahan oblastynda Hazar redaksiýasy we Hazar bilermenler kluby döredildi.
ORIENT news
