Aşgabatda inklýuziw sport festiwaly geçiriler
Ýene bir güýz baýramy – “Biz güýçli, biz deňdiris" atly inklýuziw (ösüş aýratynlyklary bar bolan adamlaryň gatnaşmagyny göz öňünde tutýan) sport festiwaly 17-nji sentýabrda paýtagtyň Olimpiýa şäherçesinde geçiriler we bu çäre Türkmenistanyň Birleşen Milletler Guramasyna agzalygynyň 30 ýyllygyna bagyşlanýar.
Bu üýtgeşik çäre hemmeleri, şol sanda aýratyn zerurlyklary bolanlary hem bir ýere jemlär, şonuň üçin oňa gatnaşyjylar diňe bir egin-egne berip, ýaryşman, eýsem birek-biregi bilen has gowy düşünişmäge mümkinçilik alarlar, töweregindäkileriň kynçylyklaryny duýarlar. Bu barada köplenç halatda adamlaryň käbiri pikir hem etmeýär.
Olar üçin sportuň dürli görnüşleri boýunça açyk türgenleşikler we ussatlyk sapaklary, basketbol, woleýbol, futbol, stol tennisi we küşt üçin interaktiw oýun meýdançalary gurnalar. Baýramçylyk ýagdaýynda ýetginjekler bilen mümkinçilikleri çäkli ýaşlar we olaryň ene-atalary birleşip, bu özboluşly ajaýyp güni bilelikde geçirip bilerler.
Festiwalyň esasy maksady – ösüş aýratynlyklary bolan adamlaryň jemgyýetçilik durmuşyna gatnaşmagynyň ähmiýetini görkezmek, adaty we “aýratyn” adamlaryň bilelikde sport bilen meşgullanmagyny göz öňünde tutýan inklýuziwligi wagyz etmek we ýaýratmak bolup durýar.
Daşary işler ministrliginiň goldaw bermeginde BMG-nyň Türkmenistandaky wekilleri bilen bilelikde "Ýeňme" jemgyýetçilik guramasy, Türkmenistanyň Maýyplar üçin merkezi bedenterbiýe we sport kluby, Maýyplara goldaw merkezi, Körler we kerler jemgyýeti, DÖM-nyň ilçileri, körler üçin küşt merkezi we "Agama" jemgyýetçilik kluby baýramçylyk çäresiniň guramaçylary bolup çykyş edýärler. Giriş mugt.
ORIENT news
