Daşkentde geçiriljek sammitde Merkezi Aziýanyň söwda bilen meşgullanýan zenanlary üçin kynçylyklar we mümkinçilikler ara alnyp maslahatlaşylar
– USAID-iň Merkezi Aziýada söwda boýunça maksatnamasy 21-nji sentýabrda Özbegistanyň paýtagtynda “Söwda bilen meşgullanýan aýallar: Merkezi Aziýada aýallar üçin kynçylyklar we mümkinçilikler. Iň oňat tejribeler” atly ikinji sebitleýin aýallar sammitini geçirer – diýip, gurama metbugat habarnamasynda habar berýär.
Sammitiň maksady Merkezi Aziýa ýurtlarynyň ykdysadyýetiniň ähli pudaklarynda, şol sanda söwda we gümrük dolandyryşynda gender taraplarynyň göz öňünde tutulmagyny üpjün etmekden ybarat.
Sammit Zoom platformasynda geçiriler we şu salgy boýunça ýaýlyma berler. Ol kärhanalaryň eýeleri we ýolbaşçylary bolan zenan telekeçileri we menejerleri, jemgyýetçilik işgärleri, işewür aýallar birleşikleriniň, döwlet edaralarynyň we hökümete degişli bolmadyk guramalaryň zenan wekillerini birleşdirer.
Bu çäre gümrük pudagynda gender deňliginiň ähmiýeti, sebitde elektron söwdanyň ösüşine syn, şeýle hem Özbegistanda “Aýallar ulagda we logistikada” atly assosiasiýanyň wekilhanasyny açmagyň artykmaçlyklary ýaly meselelere bagyşlanan birnäçe bölümçelerden ybarat bolar.
USAID-iň Merkezi Aziýada söwda boýunça maksatnamasy bu sammiti Ýewropanyň Ösüş we täzeleniş banky (ÝÖTB) bilen ABŞ-nyň Söwda hukuklaryny ösüş maksatnamasy (CLDP) bilen hyzmatdaşlykda gurnaýar.
Çärä gatnaşmak üçin elektron hasaba alyş blankasyny dolduryp bilersiňiz. Sammitiň deslapky meýilnamasy bilen şu salgyda tanyşyp bilersiňiz.
Has giňişleýin maglumat üçin gulmira_myrzakmat@dai.com e-mail salgysy boýunça habarlaşmak bolar.
ORIENT news
Foto: uz.usembassy.gov
