Türkmenistanda pagta ýygym möwsümi 7-nji sentýabrda başlar
7-nji sentýabrda Türkmenistanyň dört welaýatynda - Ahal, Balkan, Lebap we Mary welaýatlarynda köpçülikleýin pagta ýygym möwsümi başlar. Ýurduň demirgazyk sebiti bolan Daşoguz welaýaty pagta ýygymyna, adatça bir hepde soň, 14-nji sentýabrda girişer.
Bu seneler anna güni Türkmenistanyň hökümetiniň mejlisinde Prezident Serdar Berdimuhamedow tarapyndan tassyklandy. Döwlet baştutany ýurduň pagtaçy daýhanlaryna we oba hojalygynyň ähli zähmetkeşlerine saglyk, abadançylyk we işlerinde uly üstünlikler arzuw etdi.
2022-nji ýylyň ýazynda Türkmenistanda 580 müň gektara pagta ekildi, bu bolsa öňki ýyllara garanyňda, 40 müň gektar az. Ýerli ekerançylyk arkaly azyk bolçulygyny üpjün etmek üçin kartoşka we beýleki miwe we gök önüm ekinlerini ösdürip ýetişdirmegiň peýdasyna pagta ekilýän meýdanlaryň göwrümi azaldyldy.
ORIENT news
