TDHÇMB-niň söwdalary: daşary ýurtlaryň işewürleri türkmen STG-ne we uçar kerosinine gyzyklanma bildirdiler
Geçen hepde Türkmenistanyň Döwlet haryt-çig mal biržasynyň söwdalarynda umumy bahasy $5,4 million we 14,2 million manat bolan içerki geleşikleriň 20-si baglaşyldy diýip, ORIENT-iň habarçysy habar berýär.
Daşary ýurtly işewürler türkmen suwuklandyrylan gazyna gyzyklanma bildirdiler. Eksporta jemi 6 müň tonna STG ýerlenildi, onuň bir tonnasynyň bahasy $519 deň boldy.
Şeýle hem TS-1 görnüşli uçar kerosini daşary ýurtly hyzmatdaşlaryň isleginden peýdalandy, onuň 2 müň tonnasy BAE-ne ugradyldy. Nebit önüminiň bir tonnasynyň bahasy $1 180 barabar boldy.
Hepdäniň dowamynda ýerli telekeçiler TDHÇMB-niň söwdalarynda Т60-475-119 görnüşli polietilen, ýokary dykyzlykly polietilen, P4-D2 görnüşli plastika önümlerini we elde dokalan halylary satyn aldylar.
Söwdalara çykarylýan harytlar baradaky maglumatlar bilen Türkmenistanyň Döwlet haryt-çig mal biržasynyň şu salgy boýunça saýtyndan tanşyp bolar.
Oba hojalygy, senagat we kommunikasiýa, şeýle hem söwda toplumyna degişli ugurlar boýunça söwdalar duşenbe gününden-anna güni aralygynda 16:00-da, şenbe güni 11:30-da başlanýar. Nebit-gaz ugry boýunça birža söwdalary duşenbe gününden-anna güni aralygynda 16:30-da, şenbe güni 12:00-da geçirilýär.
Şunuň bilen bir wagtda, saýtda tmex.gov.tm döredilen degişli hyzmatlar arkaly göniden-göni öndürijiler bilen habarlaşyp, birža harytlarynyň söwdasynyň dowamy bilen tanşyp bolar. Şeýle hem birža harytlaryny satmak baradaky bildirişleri ýerleşdirmek mümkinçiligi elýeterlidir.
ORIENT news
