Walentina Matwiýenko: Russiýada Türkmenistanyň Halk Maslahatynyň Başlygynyň sapar bilen gelmegine garaşylýar
Türkmenistanyň Halk Maslahatynyň Başlygyna Russiýada resmi sapar bilen gelmegine garaşylýar. Bu barada duşenbe güni RF-niň parlamentiniň ýokary palatasynyň ýolbaşçysy Walentina Matwiýenko türkmen kärdeşi Gurbanguly Berdimuhamedow bilen telefon arkaly söhbetdeşliginiň dowamynda aýtdy.
RF-niň Federal ýygnagynyň Federasiýa Geňeşiniň Başlygy Milli Geňeşiň Halk Maslahatynyň Başlygyny Russiýanyň IV derejeli “Watan öňünde bitiren hyzmatlary üçin” diýen ordeni bilen sylaglanmagy bilen gutlap, şu mynasybetli Prezident Wladimir Putinden gutlag sözlerini ýetirdi. Walentina Matwiýenko dostluk we hoşniýetli goňşuçylyk däplerinde döwletara gatnaşyklarynyň ösdürilmegine Gurbanguly Berdimuhamedowyň uly goşandyny belledi.
Türkmen Parlamentiniň ýokary palatasynyň Başlygy sylagy Türkmenistanyň hem-de Russiýanyň köp ýyllaryň dowamynda bilelikde geçen döredijilikli ýoluna berlen ýokary baha hökmünde kabul edýändigini aýtdy. Şeýle hem Gurbanguly Berdimuhamedow türkmen-rus hyzmatdaşlygynyň pugtalandyrylmagyna Wladimir Putiniň ajaýyp goşandyny nygtady.
Parlamentleriň ýolbaşçylary giň gerimli ikitaraplaýyn gün tertibini öňe ilerletmek üçin iki ýurduň kanun çykaryjy edaralarynyň özara gatnaşyklarynyň eýeleýän möhüm ornuny bellediler.
ORIENT news
