Türkmenistanda takmynan 5 trillion kub metr gaz ätiýaçlygy bolan 149 sany gaz ýatagy tapyldy
Türkmenistanda ätiýaçlyklary 4,97 trillion kub metrden gowrak bolan gaz we gaz kondensat ýataklarynyň 149-ysy tapyldy. Bu barada Russiýanyň “Praým” ykdysady maglumat gullugy türkmen KHBS-ne salgylanyp, habar berýär.
Habarda "Türkmenistanda ätiýaçlyklary 4,970,768 million kub metr bolan 149 sany gaz we gaz kondensat ýatagy, şol sanda gury ýerde – 139-ysy, Hazar deňzinde – 10-usy tapyldy" diýilýär.
Şeýle-de onda: "Ätiýaçlygy 2,6 milliard kub metrden gowrak bolan 54 sany ýatak özleşdirilýär, 11 sany ýatak özleşdirilmäge taýýar edildi, 73 sany ýatakda gözleg işleri alnyp barylýar, 11-isi bolsa konserwirlenen ýagdaýda saklanýar" diýlip bellenýär.
“Praým” şeýle hem, ýurtda “Türkmengaz”, “Türkmennebit” Döwlet konsernleriniň we “Turkmengeologiýa” Döwlet korporasiýasynyň gaz öndürýändigini, umumy gaz önümçiliginiň 80 %-den gowragynyň “Türkmengaz”-yň paýyna düşýändigini belleýär.
Tebigy gaz gorlary boýunça Türkmenistan Russiýa, Eýran we Katar bilen birlikde dünýäde ilkinji dört ýurduň hataryna girýär. Türkmen gazynyň iň iri satyn alyjysy Hytaýdyr.
Nury AMANOW
