TDHÇMB-niň söwdalary: nebit önümleri uly islegden peýdalanyldy
Sişenbe güni, 17-nji awgustda Türkmenistanyň Döwlet haryt-çig mal biržasynyň söwdalarynda umumy bahasy $20,6 million we 3,9 million manatlyk 25 geleşik baglaşyldy diýip, ORIENT-iň habarçysy habar berýär.
Türkiýeden we Owganystandan gelen işewürler 700 tonnadan gowrak göni işlenilen benzini $432,8 müň satyn aldylar. Nebit önüminiň bahasy, öňki söwdalardaky bilen deňeşdirilende 14,6% arzanlap, bir tonnasynyň bahasy $596,25 bahalandyryldy.
Owganystanyň wekili $831,8 müň arassalanan dizel ýangyjynyň 800 tonnasyny almak barada geleşik baglaşdy. Önümiň bahasy 9% arzanlap, bir tonnasynyň bahasy $1 039,75 barabar boldy.
Türkiýeden we Owganystandan gelen telekeçiler jemi 10 müň tonna A-95 görnüşli awtoulag benzini satyn aldylar. Baglaşylan geleşikleriň umumy bahasy $8,8 million barabar boldy. Ýangyjyň bahasy 6% arzanlap, bir tonnasynyň bahasy $880,25 deň boldy.
Şweýsariýadan, BAE-den, Özbegistandan hem-de Owganystandan gelen işewürler söwdalarda umumy bahasy $10,6 million-a 9,6 müň tonna TS-1 uçar kerosinini satyn aldylar. Nebit önüminiň bir tonnasynyň bahasy $1 107,50 deň boldy, bu bolsa öňki söwdalar bilen deňeşdirilende 6,7% arzandyr.
Içerki bazarda bolsa ýerli telekeçi umumy bahasy 3,9 million manada deň bolan ýokary dykyzlykly T60-475-119 görnüşli polietilen satyn aldy.
Söwdalara çykarylýan harytlar baradaky maglumatlar bilen Türkmenistanyň Döwlet haryt-çig mal biržasynyň şu salgy boýunça saýtyndan tanşyp bolar.
Oba hojalygy, senagat we kommunikasiýa, şeýle hem söwda toplumyna degişli ugurlar boýunça söwdalar duşenbe gününden-anna güni aralygynda 16:00-da, şenbe güni 11:30-da başlanýar. Nebit-gaz ugry boýunça birža söwdalary duşenbe gününden-anna güni aralygynda 16:30-da, şenbe güni 12:00-da geçirilýär.
Şunuň bilen bir wagtda, saýtda tmex.gov.tm döredilen degişli hyzmatlar arkaly göniden-göni öndürijiler bilen habarlaşyp, birža harytlarynyň söwdasynyň dowamy bilen tanşyp bolar. Şeýle hem birža harytlaryny satmak baradaky bildirişleri ýerleşdirmek mümkinçiligi elýeterlidir.
ORIENT news
