Türkmenistan hökümetiniň agzalary daşary ýurt delegasiýalarynyň ýolbaşçylary bilen gepleşikleri geçirdi
Dynç güni Türkmenistan hökümetiniň agzalary we ýurduň ulag-aragatnaşyk pudagynyň ýolbaşçylary dürli ýurtlaryň we halkara guramalarynyň wekiliýetleriniň ýolbaşçylary, ýokary derejeli wekilleri bilen birnäçe ikitaraplaýyn duşuşyklary geçirdiler.
Gepleşikler 15-nji awgustda duşenbe güni Türkmenbaşyda geçiriljek deňze çykmaga mümkinçiligi bolmadyk ösüp barýan ýurtlaryň (DÇMBÖBÝ) ulag forumynyň öňüsyrasynda geçirildi. Bu foruma 40-a golaý ýurtdan, BMG-nyň agentliklerinden, sebitleýin we sebitara birleşiklerden, maliýe guramalaryndan delegatlar we spikerler gatnaşar.
Möhüm forumyň öňüsyrasynda Awazadaky “Berkarar” myhmanhanasynda geçirilen iş duşuşyklarynda diňe bir gün tertibindäki meseleler däl, eýsem ulag ulgamy we beýleki ugurlar boýunça has giňişleýin özara gatnaşyklar baradaky meselelere hem garaldy.
Hususan-da, wise-premýer, Daşary işler ministri Raşid Meredow DÇMBÖBÝ üçin Halkara barlag merkeziniň operasiýalar bölüminiň müdiri Dulguun Damdin-Od we ÝHHG-nyň ykdysady we daşky gurşaw meseleleri boýunça utgaşdyryjysy Igli Hasani bilen duşuşdy.
Şeýle hem, Daşary işler ministri Eýran Yslam Respublikasynyň ýollar we şäher gurluşygy ministri Rostam Ghasemi, Eýranyň Daşary işler ministriniň ykdysady meseleler boýunça orunbasary Mahdi Safari, şeýle hem BAE-niň Energetika we infrastruktura ministri Suhail Al Mazrui bilen duşuşdy.
Ministrler Kabinetiniň ýanyndaky Ulag we aragatnaşyk agentliginiň başlygy Mämmethan Çakyýew EHHG-nyň Ykdysady we daşky gurşaw meseleleri boýunça utgaşdyryjysy Igli Hasani, Eýran Yslam Respublikasynyň Ýollar we şäher ösüşi ministri Rostam Gasemi, EYR-nyň Daşary işler ministriniň orunbasary Mahdi Safari, TRACECA Hökümetara komissiýasynyň Hemişelik sekretariatynyň Baş sekretary Aset Asawbaýew, Saud Arabystanynyň Ulag baş müdirliginiň başlygynyň orunbasary Albad Fahad Suliman, BAE-niň Energetika we infrastruktura ministri Suhail Al Mazrui we Özbegistanyň Ulag ministri Ilhom Makhamow bilen hyzmatdaşlygyň geljegini ara alyp maslahatlaşdy.
EýranYslam Respublikasynyň Daşary işler ministriniň Ykdysady meseleler boýunça orunbasary Mahdi Safari bilen wise-premýerler Şahym Abdrahmanow, Çarymyrat Pürçekow we Annageldi Ýazmyradow aýry-aýry duşuşyklary geçirdiler.
Mundan başga-da, ulag we aragatnaşyk guramalary derejesinde pudagara geňeşmeler geçirildi.
ORIENT news
