Türkmenistan ÝB-ne önümleriň eksportuny 60%-den gowrak artdyrdy
Geçen ýyl Türkmenistan Ýewropa Bileleşiginiň ýurtlaryna eksportuny 2020-nji ýyl bilen deňeşdirilende, 63% artdyrdy. Şeýle maglumaty Türkmenistanyň Ykdysadçylar birleşiginiň başlygy Ýuriý Aronskiý resmi metbugat üçin ýazan syn beriş teswirlemesinde getirýär.
Ýewropa Bileleşiginiň ýurtlaryna türkmen ekspotunyň artdyrylmagy milli ykdysadyýetiň pugtalanýandygyny, öndürilýän önümleriň hiliniň ýokarlanýandygyny, önümleriň bäsdeşlige ukyplylygynyň artýandygyny hem-de halkara ölçeglerine laýyk gelýändigini görkezýär.
ÝB-ne jemi $440 million möçberde önümler iberildi. Himiýa önümleri, mineral dökünler we dokma önümleri esasy eksport harytlary boldy. Şolary Gresiýa, Italiýa, Rumyniýa satyn aldy.
Şeýle hem bilermen Türkmenistanyň Eýranyň üsti bilen Azerbaýjana tebigy gazy ibermeginiň köp babatda hut Ýewropa ýurtlary üçin niýetlenendigini belleýär.
Şunuň bilen bir wagtda Aronskiý Türkmenistanyň Bütindünýä söwda guramasyna (BSG) goşulyşýan ýurt derejesini almagynyň ähmiýetini nygtaýar. Bu bolsa ahyrky netijede, döwletiň geosyýasy we ykdysady mümkinçilikleriniň ulanylyşyny güýçlendirmelidir.
Umuman, Türkmenistanyň eksporty 2020-nji ýyl bilen deňeşdirilende, 2021-nji ýylda 34,8% ýokarlandy diýlip, bilermeniň makalasynda bellenilýär.
ORIENT news
