Maryda täze kände gazyň senagat akymy alyndy
Türkmen geologlary Türkmenistanyň günorta-gündogar sebitindäki “Şerepli” diýen täze kände tebigy gazyň senagat akymyny aldylar diýip, şu gün resmi metbugat ýazýar.
Taslama çuňlugy 2 müň 600 metre deň bolan №01 belgili ulanyş-baha beriş guýusyndan her gije-gündizde 695 müň kub metre çenli tebigy gaz alnar diýip, hünärmenler hasapladylar. Geljekde guýynyň bir gije-gündizki önüm berijiliginiň artmagyna garaşylýar.
Täze ýatakdaky tebigy gaz düzüminde kükürt-wodorodyň bolmazlygy bilen tapawutlanýar. Bu bolsa onuň ýokary hil ölçeglerine laýyk gelýändiginden hem-de dünýä bazarynda uly geljeginiň boljakdygyndan habar berýär.
Tebigy gazyň alynyşynyň artdyrylmagy önümçilik işleriniň döwrebaplaşdyrylmagy we «Türkmengazburawlaýyş» müdirliginiň gaz ýatagynda ýarym ýyl töweregi zähmet çeken geologlarynyň sazlaşykly işlemekleri bilen üpjün edildi.
Mary welaýatynda häzir bir wagtyň özünde gaz känleriniň jemi üçüsinde, şol sanda «Kelleli» we «Ýylan» känlerinde guýylary burawlamak işleri amala aşyrylýar. «Şerepli» gaz käninde ýakyn günlerde №02 belgili guýyda burawlaýyş işlerine girişiler.
ORIENT news
