TDHÇMB-niň söwdalary: suwuklandyrylan gaz we ýangyçlaryň dürli görnüşleri satyldy
Sişenbe güni, 19-njy iýulda Türkmenistanyň Döwlet haryt-çig mal biržasynyň söwdalarynda umumy bahasy $5,1 mln we 398,3 müň manat bolan 14 geleşik baglaşyldy diýip, ORIENT-iň habarçysy habar berýär.
Owganystanyň telekeçileri umumy bahasy $439,5 müň suwuklandyrylan gaz satyn aldylar. STG-yň bahasy soňky söwdalardaky bilen deňeşdirilende, 3,5% artyp, bir tonnasynyň bahasy $586 barabar boldy.
L-0,2-62 görnüşli dizel ýangyjy hem Owganystanyň işewür toparlarynda gyzyklanma döretdi. Onuň bahasy geçenki söwdalardaky bilen deňeşdirilende, 21,4% ýokarlanyp, bir tonnasy $1 208,75 deň boldy. Umumy bahasy $3,6 million bolan bu önümiň eksporta jemi 3 müň tonnasy ýerlenildi.
BAE-niň we Owganystanyň telekeçileri A-98 görnüşli etilsiz awtoulag benzininiň jemi 1 müň tonnasyny satyn aldylar, onuň bir tonnasynyň bahasy $1 121 deň boldy. Geleşikleriň umumy bahasy $1,1 million-dan gowrak boldy.
Içerki bazarda ýerli telekeçiler umumy bahasy 396 müň manat bolan Т60-475-119 kysymly ýokary dykyzlykly polietileniň 22 tonnasyny hem-de 2,3 müň manatlyk türkmen el halylaryny satyn aldylar.
Söwdalara çykarylýan harytlar baradaky maglumatlar bilen Türkmenistanyň Döwlet haryt-çig mal biržasynyň şu salgy boýunça saýtyndan tanşyp bolar.
Oba hojalygy, senagat we kommunikasiýa, şeýle hem söwda toplumyna degişli ugurlar boýunça söwdalar duşenbe gününden-anna güni aralygynda 16:00-da, şenbe güni 11:30-da başlanýar. Nebit-gaz ugry boýunça birža söwdalary duşenbe gününden-anna güni aralygynda 16:30-da, şenbe güni 12:00-da geçirilýär.
Şunuň bilen bir wagtda, saýtda tmex.gov.tm döredilen degişli hyzmatlar arkaly göniden-göni öndürijiler bilen habarlaşyp, birža harytlarynyň söwdasynyň dowamy bilen tanşyp bolar. Şeýle hem birža harytlaryny satmak baradaky bildirişleri ýerleşdirmek mümkinçiligi elýeterlidir.
ORIENT news
