Milli gämiler türkmen nebit önümleriniň ýurt daşyna çykarylyşyny artdyrmaga mümkinçilik berdi
Türkmenbaşy şäherinde gurlan häzirkizaman Halkara deňiz porty we täze milli gämiler türkmen nebit önümleriniň daşary ýurtlarda durnukly üpjünçiligini ýola goýmaga mümkinçilik berdi.
Bu barada “Türkmendeňizderýaýollary” agentliginiň başlygy Agamyrat Haýytmyradow Aşgabatda geçýän “Halkara ulag-üstaşyr geçelgeleri: Baglanyşyklylyk we ösüş” atly halkara maslahatynda aýtdy.
Agentligiň başlygy nebit önümlerini daşamak üçin innowasiýa taslamalarynyň çäginde 7 sany döwrebap gäminiň gurlandygyny habar berdi. – Bu bolsa Türkmenistanyň deňiz flotunyň bäsdeşlige ukyplylygyny ep-esli ýokarlandyrdy – diýip, Haýytmyradow belledi.
– Häzirki wagtda dünýä bazarynda Türkmenistana üstünlikli wekilçilik edýän bu gämiler Hazaryň portlarynyň arasynda halkara gatnawlaryny amala aşyrýarlar – diýip, ol dowam etdi.
Şol bir wagtyň özünde, Türkmenistan Türkmenbaşy şäheriniň Halkara deňiz porty tarapyndan hödürlenýän hyzmatlaryň gerimini giňeltmek üçin dört sany tirkeg gämisini (buksir) we iki sany ýokary tizlikli ýolagçy gämisini satyn alyp, döwrebaplaşdyrdy.
Türkmenistanyň maksady Hazar deňziniň gündogar kenarýakasyndaky öz deňiz duralgasyny sebitdäki iň kuwwatly portlaryň birine we Ýewraziýa yklymynda deňiz, demir ýol we howa arkaly gatnawlary utgaşdyrjak dünýäniň iň uly ulag-logistika merkezine öwürmekdir.
“Türkmendeňizderýaýollary” agentliginiň başlygy: “Şunuň bilen baglylykda, gyzyklanma bildirýän kompaniýalaryň ählisini Türkmenbaşy şäheriniň Halkara deňiz portunda hyzmatdaşlyga çagyrýarys” – diýdi.
ORIENT news
