Türkmenistan ulag babatda halkara borçnamalaryna ygrarlydyr
Duşenbe güni Aşgabatda ulag-üstaşyr geçelgeleri boýunça başlanan halkara maslahatynyň umumy mejlisine gatnaşyjylar täze çagyryşlar we mümkinçilikler babatda ulag-logistika ulgamynyň pandemiýdan soň täzeden dikeldilmegine garadylar.
Halkara awtomobil ulaglary birleşiginiň (IRU) Ýewraziýa ýurtlary boýunça hemişelik wekilhanasynyň ýolbaşçysy Wadim Zaharenko umumy mejlisiň alyp baryjysy bolup çykyş etdi, “Türkmenhowaýollary” agentliginiň başlygy Döwran Saburow bolsa mejlisi açdy.
Soňra çärä sanly ulgam arkaly ilçi, Türkmenistanyň BMG-niň Ženewadaky bölüminiň ýanyndaky hemişelik wekili Atageldi Haljanow goşuldy. Ol çykyşynda Aşgabadyň gatnaşmagyndaky halkara ulag taslamalarynyň arasynda 2016-njy ýylda güýje giren Omanyň, Eýranyň, Türkmenistanyň we Özbegistanyň arasynda üstaşyr geçelgäni döretmek hakyndaky ylalaşygy aýratyn nygtady. Onuň pikirine görä bu ylalaşygyň durmuşa geçirilmegi Merkezi Aziýa döwletleriniň Ýakyn we Orta Gündogaryň ýurtlary bilen özara bähbitli gatnaşyklary ösdürmek üçin uly mümkinçilikleri açýar. Bu ýol Merkezi Aziýanyň operatorlaryna Pars aýlagynyň portlaryna çykmaga has oňaýly mümkinçilikleri açýar, şeýle hem Russiýa bilen Hytaýa şonuň üsti bilen täze bazarlara çykmaga mümkinçilik berýär.
Şeýle hem ilçi Owganystany, Türkmenistanyň, Azerbaýjany, Gruziýany we Türkiýäni birleşdirýän Lazurit ulag geçelgesiniň eýeleýän ornuny nygtady.
Şunuň bilen baglylykda Haljanow ulag we üstaşyr geçmäge degişli amallary ýönekeýleşdirmek babatda bar bolan hukuk gurallarynyň ulanylyşyny giňeltmek boýunça bilelikdäki tagallalaryň wajypdygyny belledi.
Türkmenistan ulag ulgamyna degişli köptaraplaýyn resminalara gatnaşmagyny hemişe giňeldip, öz halkara borçnamalarynyň ählisini ýerine ýetirmek bilen birlikde, ysnyşykly hem-de giň hyzmatdaşlyga pugta we yzygiderli ygrarlydyr diýip, ilçi aýtdy.
ORIENT news
