TDHÇMB-niň söwdalary: STG we dizel ýangyjy uly islegden peýdalanyldy
Geçen hepdede Türkmenistanyň Döwlet haryt-çig mal biržasynyň söwdalarynda umumy bahasy $15,5 million bolan 45 geleşik baglaşyldy diýip, ORIENT-iň habarçysy habar berýär.
Söwdalarda suw bilen arassalanan dizel ýangyjy hem-de suwuklandyrylan gaz has uly islegden peýdalanyldy. Hepdäniň dowamynda 21,2 müň tonna STG we 3 müň tonna dizel ýangyjy eksporta satyldy.
Suwuklandyrylan gazyň bir tonnasy üçin iň ýokary baha $550 barabar boldy, bu bolsa bu haryt boýunça geçen gezekdäki söwdalarda baglaşylan baha bilen deňeşdirilende, 10,8% köpdür.
ABŞ-nyň dollarynda TDHÇMB auksionynda LNG we dizel ýangyjynyň bahalary
Geçen hepde dellallar suw bilen arassalanan dizel ýangyjynyň bir tonnasy üçin $1 308,50 teklip etdiler, bu bolsa mundan ozalky söwdalardaky bilen deňeşdirilende 5,3% ýokarydyr.
Şeýle hem geçen hepde söwdalarda reňklenen tüýjümek önümler, tekiz reňklenen hem-de žakkard tüýjümek önümler eksporta satyldy.
Içerki bazarda ýerli işewürler umumy bahasy 78 million manat bolan tehniki külkelenen kükürdiň jemi 15 müň tonnasyny hem-de umumy 12,2 müň manada elde dokalan halylaryň dürli görnüşlerini satyn aldylar.
Söwdalara çykarylýan harytlar baradaky maglumatlar bilen Türkmenistanyň Döwlet haryt-çig mal biržasynyň şu salgydaky saýtyndan tanşyp bolar. TDHÇMB-de indiki söwdalar çarşenbe güni 13-nji iýulda geçiriler, çünki Türkmenistanda Gurban baýramy mynasybetli duşenbe we sişenbe dynç günleri diýlip yglan edildi.
Şunuň bilen bir wagtda, saýtda tmex.gov.tm döredilen degişli hyzmatlar arkaly göniden-göni öndürijiler bilen habarlaşyp, birža harytlarynyň söwdasynyň dowamy bilen tanşyp bolar. Şeýle hem birža harytlaryny satmak baradaky bildirişleri ýerleşdirmek mümkinçiligi elýeterlidir.
ORIENT news
