Türkmenistanda ýarym ýylda obalarda 246 müň inedördül metrden gowrak ýaşaýyş jaýlary guruldy
Merkezden uzaklarda ýerleşen etraplaryň durmuş derejesini ýokarlandyrmaga gönükdirilen degişli milli maksatnamanyň çäklerinde 2022-nji ýylyň ýanwar-iýun aýlary aralygynda Türkmenistanyň oba ýerlerinde 246 müň inedördül metrden gowrak ýaşaýyş jaýlary ulanmaga berildi.
Mundan başga-da, Oba milli maksatnamasyna laýyklykda, şu döwürde üç hassahana guruldy, durmuş we önümçilik maksatly beýleki desgalarda işler dowam edýär.
Bular barada anna güni türkmen hökümetiniň mejlisinde maliýe we ykdysadyýet ministri Muhammetgeldi Serdarow hasabat berdi.
Prezident Serdar Berdimuhamedow 2008-nji ýylda Oba milli maksatnamasynyň durmuşa geçirilip başlanandan bäri ýurdumyzyň welaýatlarynda 900-den gowrak täze desgalaryň ulanmaga tabşyrylandygyny, onlarça müň kilometr inženerçilik ulgamlarynyň çekilendigini belledi.
Şeýle hem mejlisde geljek bäşýyllyk döwre – 2028-nji ýyla çenli obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş derejesini özgertmek boýunça maksatnama tassyklanyldy.
ORIENT news
