Aşgabat gazna biržasy ikinji bazarda paýnamalaryň söwdasynyň mümkindigini ýatlatdy
Aşgabat gazna biržasy (AGB) öz resmi saýtyndaky habarnamasynda maýadarlara we emitentlere gymmatly kagyzlaryň ikinji bazarynda paýnamalary satmagyň we satyn almagyň mümkindigini ýatlatdy.
Ikinji bazar söwdasy gymmatly kagyzlar bazarynda dolanyşykda bolan paýnamalaryň hakyky bazar bahasyny anyklamaga mümkinçilik berýär. AGB-nyň esasy wezipeleriniň biri – bu bahany teklip we isleg esasynda kesgitlemek – diýlip, habarda aýdylýar.
Şunuň bilen baglylykda, Aşgabat gazna biržasy müşderilerini 46-86-27 we 46-88-05 telefon belgileri arkaly ikinji bazarda paýnamalary satyn almak we satmak baradaky tekliplerini bermäge çagyrdy.
Şeýlelik bilen, ýüz tutmalaryň belli bir sanyndan soň, AGB dolanyşykdaky paýnamalaryň bazar bahasyny kesgitläp biler we geljekde gymmatly kagyzlaryň ikinji bazaryndaky dolanyşygy ýokarlandyrmak üçin bu maglumatlary maýadarlar bilen paýlaşar.
Häzirki wagtda AGB biržada baglaşylýan geleşikler baradaky maglumatlar bilen şu salgyda yzygiderli paýlaşyp durýar.
Birža “Senagat” (paýnama üçin 20 TMT), “Rysgal” (paýnama üçin 5250 TMT) we “Halkbank” (paýnama üçin 303 TMT) banklarynyň paýnamalaryny satyn almaga mümkinçilik berýär. AGB-nyň dolanyşygynda jemi 52,2 million TMT paýnama bar.
Geljek üç ýylyň dowamynda USAID-iň goldaw bermeginde AGB-nyň ýurtda hususy dellal we maýa goýum kompaniýalarynyň döremegine, gymmatly kagyzlar hasaplaşyklary üçin merkezi ammaryň döredilmegine, maýadarlar we emitentler (gymmatly kagyzlary çykarýan guramalar) üçin amatly bazar gurşawynyň döremegine ýardam berjekdigi barada ozal ORIENT habar beripdi.
Aşgabat gazna biržasynda elektron söwda ulgamyny ornaşdyrmak we täze maliýe önümlerini, şol sanda korporatiw obligasiýalary, REPO, birža maýa goýum gaznalaryny, deriwatiwleri, ýagny 2-nji derejeli gymmatly kagyzlary satuwa çykarmak meýilleşdirilýär.
ORIENT news
