Aşgabat we Baku energiýa hyzmatdaşlygyny giňeltmek mümkinçiligine seredýärler
Türkmenistanyň Daşary işler ministri Raşid Meredow iş sapary bilen Aşgabat şäherine gelen Azerbaýjanyň Ykdysadyýet ministri Mikaýil Jabbarowyň ýolbaşçylygyndaky wekiliýeti bilen duşuşdy.
Türkmenistanyň Daşary işler ministrliginiň metbugat gullugynyň habar bermegine görä, duşuşygyň dowamynda taraplar ykdysady hyzmatdaşlygyň gidişini, energiýa pudagynda ösüş mümkinçiligini, halkara bazarlaryny energiýa çeşmeleri bilen üpjün etmegiň ugruny diwersifikasiýa etmek meselesini ara alyp maslahatlaşdylar.
2021-nji ýylyň ýanwar aýynda gol çekilen Hazar deňzindäki “Dostluk” uglewodorod ýatagynda bilelikde gözleg, barlag we özleşdirme işlerini geçirmek barada iki ýurduň hökümetleriniň arasynda özara düşünişmek Memorandumy türkmen-azerbaýjan energiýa hyzmatdaşlygynda möhüm waka bolup durýar. Habarda bu babatda, türkmen tarapynyň hyzmatdaşlygyň bu ugurlary boýunça ikitaraplaýyn maslahatlary dowam etdirmäge taýýardygy barada aýdylýar.
ORIENT news
