Türkmenistanda Gazagystanyň bugdaýyny saklamaga niýetlenen elewator gurlar
Türkmenistan we Gazagystan paýly gatnaşmak arkaly Türkmenistanyň Mary welaýatynyň Serhetabat etrabynda Gazagystanyň 100 müň tonna bugdaýyny saklamaga niýetlenilen elewator gurar diýip, obasenagat meseleleri boýunça wise-premýer Annageldi Ýazmyradow gürrüň berdi.
Desga bugdaýy we uny Türkmenistanyň üstünden Owaganystana üstaşyr ibermek boýunça Gazagystan bilen hyzmatdaşlygy ýola goýmak üçin gurlar. Bu bolsa önümiň ýetirilmegini tizleşdirer we bu ýagdaýy yzygiderli häsiýete eýe eder.
Elewatory “Çemenabat” maldarçylyk hojalygynyň ýerinde gurmak meýilleşdirilýär. Şeýle hem onuň ýanynda ýüki ibermekde ulanyljak haltalary taýýarlamak üçin önümçilik bölümi bina ediler.
Türkmenistanyň Prezidenti Serdar Berdimuhamedow duşenbe güni geçiren iş maslahatynda desgany gurmagyň sebitiň ýurtlarynyň arasyndaky gatnaşyklary ösdürmekde hem-de Owganystanyň ykdysadyýetini dikeltmekde ähmiýetli boljakdygyny belläp, ony gurmak boýunça teklipleri giňişleýin öwrenmegi tabşyrdy.
ORIENT news
