BSG-nyň baş müdiriniň orunbasary Aşgabada geldi
Türkmenistanyň Daşary işler ministri Raşid Meredow iş sapary bilen Aşgabada gelen Bütindünýä söwda guramasynyň (BSG) baş müdiriniň orunbasary Çžan Sýançen bilen duşuşdy. Bu barada duşenbe güni Türkmenistanyň Daşary işler ministrliginiň gullugy habar berýär.
Duşuşygyň dowamynda soňky ýyllarda Türkmenistan bilen BSG-nyň arasyndaky gatnaşyklaryň ep-esli işjeňleşendigi bellenildi. Şu ýylyň fewral aýynda BSG-nyň Baş geňeşiniň mejlisinde türkmen tarapy gurama agza bolmak üçin resmi taýdan arza bilen ýüz tutdy, geňeşiň agza ýurtlary ony biragyzdan goldadylar hem-de Türkmenistana "goşulýan ýurt" statusyny bermek kararyna geldiler. Daşary işler ministri BSG-nyň sekretariatyna, şeýle-de agza ýurtlara Türkmenistanyň arzasyny goldandyklary üçin tüýs ýürekden minnetdarlyk bildirdi.
Şeýle hem, häzirkizaman dünýäde ykdysady globallaşmanyň ösýän tendensiýalary, esasanam pandemiýa ýagdaýyndan soň, Türkmenistanyň öňünde halkara söwda-ykdysady gatnaşyklar ulgamyna has işjeň goşulyşmak meselesini goýdy. Bu maksatlara ýetmegiň netijeli usullaryndan biri BSG bilen hemmetaraplaýyn hyzmatdaşlygy ösdürmek bolup durýar.
Meredow Bütindünýä söwda guramasyna goşulmak üçin ýurtda alnyp barylýan milli kanunçylyk binýadyny, daşary söwda amallaryny we düzgünlerini kämilleşdirmegi öz içine alýan taýýarlyk işleri barada guramanyň baş müdiriniň orunbasaryna habar berdi.
ORIENT news
