TDHÇMB-niň söwdalary: Jet A-1 uçarkerosininiň bahasy 10%-den gowrak ýokarlandy
Geçen hepde Türkmenistanyň Döwlet haryt-çig mal biržasynyň söwdalarynda umumy bahasy $14,8 mln we 3,8 mln manatlyk bolan 38 geleşik baglaşyldy diýip, ORIENT-iň habarçysy habar berýär.
Suw bilen arassalanan dizel ýangyjynyň 7 müň tonnasy eksporta satyldy, onuň bahasy soňky geçirilen söwdalardaky bilen deňeşdirilende, 4,7% artdy hem-de bir tonnasynyň bahasy $1 241,50 deň boldy. Bu haryt boýunça geleşikleriň umumy bahasy $8,6 mln barabar boldy.
Geçen hepde Jet A-1 uçar kerosinine hem isleg bildirildi, onuň bahasy ozalky söwdalardaky bilen deňeşdirilende 10,2% artdy hem-de bir tonnasynyň bahasy $1 139,50 deň boldy.
Şeýle hem daşary ýurtly işewürler TDHÇMB-da dürli görnüşli nah ýüplükleri we tüýjümek önümleri satyn aldylar. Önümleri satyn alan ýurtlar BAE, Türkiýe hem-de Owganystan boldy.
Söwdalara şu gün (27-nji iýunda) çykarylýan harytlar baradaky maglumatlar bilen Türkmenistanyň Döwlet haryt-çig mal biržasynyň şu salgy boýunça saýtyndan tanşyp bolar.
Oba hojalygy, senagat we kommunikasiýa, şeýle hem söwda toplumyna degişli ugurlar boýunça söwdalar duşenbe gününden-anna güni aralygynda 16:00-da, şenbe güni 11:30-da başlanýar. Nebit-gaz ugry boýunça birža söwdalary duşenbe gününden-anna güni aralygynda 16:30-da, şenbe güni 12:00-da geçirilýär.
Şunuň bilen bir wagtda, saýtda tmex.gov.tm döredilen degişli hyzmatlar arkaly göniden-göni öndürijiler bilen habarlaşyp, birža harytlarynyň söwdasynyň dowamy bilen tanşyp bolar. Şeýle hem birža harytlaryny satmak baradaky bildirişleri ýerleşdirmek mümkinçiligi elýeterlidir.
ORIENT news
