Türkmenistanda suw üpjünçiligi boýunça hökümet topary döredildi
Prezident Serdar Berdimuhamedow şenbe güni Minkab-iň mejlisinde Türkmenistanda suw üpjünçiligi boýunça Hökümet toparyny döretmek hakynda karara gol çekdi.
Ozal döwlet Baştutany şeýle düzümi döretmek barada tabşyryk beripdi. Oňa obasenagat toplumyna gözegçilik edýän wise-premýer Annageldi Ýazmyradow ýolbaşçylyk eder.
Toparyň düzümine Oba hojalyk we daşky gurşawy goramak ministrliginiň, Suw hojalygy baradaky döwlet komitetiniň, Ýokary gözegçilik edarasynyň, ylmy institutlaryň ýolbaşçylary, welaýatlaryň häkimleri hem-de beýleki jogapkär adamlar girer.
Toparyň işi ýurduň suw serişdeleriniň netijeli we oýlanyşykly ulanylmagyna, olaryň ätiýaçlygyny artdyrmaga, suw üpjünçilik desgalaryny gurmak we dolandyrmak babatda işleri utgaşdyrmaga gönükdiriler.
Şeýle hem şu hepde Serdar Berdimuhamedow Hazar deňziniň suwuny süýjediji desgalary gurmagyň we suwy Aşgabada ibermegiň mümkinçiliklerini öwrenmegi tabşyrdy.
ORIENT news
