Türkmen-rus gepleşiklerinde energetika aýratyn üns berildi
– Hepdäniň anna güni Kremlde iki ýurduň Prezidentleri tarapyndan gol çekilen Türkmenistan bilen Russiýanyň arasyndaky strategiki hyzmatdaşlygy çuňlaşdyrmak baradaky Jarnama syýasy, söwda-maýa goýum, medeni-ynsanperwerlik ugurlarynda, howpsuzlyk ulgamynda, şol sanda biologiki we maglumat howpsuzlygy ulgamlarynda bilelikdäki işiň geljek üçin ileri tutulýan ugurlaryny kesgitledi – diýip, Wladimir Putin Serdar Berdimuhamedow bilen gepleşikleriň netijeleri boýunça metbugat üçin eden çykyşynda resminamanyň düýp mazmunyny häsiýetlendirdi.
Russiýa Federasiýasynyň baştutany “şu gün gepleşiklerde aýratyn üns berlen” energetika ulgamynyň ikitaraplaýyn hyzmatdaşlygyň esasy ugurlarynyň biri bolup durýandygyny belledi.
Şunuň bilen baglylykda, Türkmenistandan gaz eksportyny guramakda “Türkmengaz” bilen hyzmatdaşlyk edýän “Gazpromy”, Hazar deňzinde “Dostluk” ýatagyny özleşdirmäge operator hökmünde gatnaşmak barada gepleşikleri alyp barýan “LUKOÝL-y”, Türkmenistandaky nebit skwažinalaryny abatlamak we hyzmat etmek bilen meşgullanýan “Tatnefti” agzap geçdi.
Putiniň aýtmagyna görä, Russiýanyň başga-da “Inter RAO”, “Silowyýe maşiny” iri energetiki kompaniýalary Türkmenistandaky taslamalary durmuşa geçirmäge gyzyklanma bildirýär.
– Gürrüň elektrik beketlerini döwrebaplaşdyrmak we täze beketleri gurmak, şol sanda, energiýanyň gaýtadan dikeldilýän çeşmelerini ulanmak arkaly; ýokary woltly elektrik geçiriji liniýalary çekmek, elektrik energiýasyny üstaşyr geçirmek we eksporta ugratmak barada barýar – diýip, Russiýanyň Prezidenti nygtap geçdi.
Beýleki pudaklarda bilelikde amala aşyrylýan iri taslamalaryň arasynda Wladimir Putin Türkmenistan üçin gurlan deňiz gämilerini, teplowozlary, “KAMAZ” üpjünçiligini, Russiýanyň “Wozroždeniýe” kompaniýasynyň alyp barýan işini ýatladyp geçdi.
ORIENT news
