Türkmenistan we Russiýa söwda-ykdysady hyzmatdaşlygy baradaky resminamalary taýýarlaýarlar
– Türkmenistan we Russiýa söwda-ykdysady hyzmatdaşlygy baradaky resminamalary gol çekmäge taýýarlaýarlar. Resminamalara Prezident Serdar Berdimuhamedowyň 10-njy iýunda Russiýa Federasiýasyna boljak ilkinji resmi saparynyň dowamynda gol çekiler – diýip, Russiýa Federasiýasynyň habarynda bellenilýär.
Ýokary derejede geçiriljek gepleşikleriň öňýanynda Russiýa Federasiýasynyň Hökümetiniň Başlygynyň orunbasary Aleksandr Nowak Türkmenistanyň wise-premýeri Şahym Abdyrahmanow bilen duşuşyk geçirdi.
– Türkmenistanyň saýlanan Prezidentiniň ilkinji daşary ýurt saparyny Russiýa amala aşyrmak baradaky karary Aşgabadyň Moskwa bilen gatnaşyklaryny berkitmek ugruny dowam etdirjekdigini tassyklaýar – diýip, Aleksandr Nowak duşuşygyň dowamynda aýtdy.
Russiýanyň wise-premýeri iki ýurduň arasyndaky ykdysady hyzmatdaşlykda ýangyç-energetika toplumynyň möhüm ornuny belläp geçdi.
– Ýangyç-energetika toplumy biziň söwda-ykdysady dolanyşygymyzda esasy orunlaryň birini eýeleýär. Türkmenistanda tebigy gazyň ägirt uly gorlary bar, bu ugurda “Gazprom” “Türkmengaz” bilen üstünlikli hyzmatdaşlyk edýär. 2019-njy ýylyň 1-nji iýulyndan türkmen gazyny satyn almak we satmak barada şertnama baglaşyldy. Mundan başga-da, Russiýa türkmen nebitini daşamak hyzmatlaryny ýerine ýetirýär, nebit pudagynda özara gatnaşyklar dowam etdirilýär, Türkmenistandaky energiýa desgalarynyň durkuny täzelemek boýunça işler alnyp barýar – diýip, Aleksandr Nowak aýtdy.
Şeýle-de, Russiýa bilen Türkmenistanyň “Demirgazyk-Günorta” Halkara ulag geçelgesiniň gündogar ugry boýunça ýük akymlaryny artdyrmaga giň mümkinçilikleri bar. Russiýanyň kompaniýalary Türkmenistanyň demirýol liniýalaryny elektrikleşdirmek, demirýol infrastrukturasyny döwrebaplaşdyrmak taslamalaryna gatnaşmak meselesiniň üstünde şu wagtdan türkmen kärdeşleri bilen işleýärler.
– Bilelikdäki tagallalarymyz bilen üstaşyr ýükleri çekmek meselesini çözeris, umuman aýdanymyzda, Türkmenistanyň üstaşyr geçelge hökmünde ähli mümkinçiliklerini iş ýüzüne geçireris – diýip, Nowak belledi.
Aleksandr Nowak 25-nji Sankt-Peterburg halkara ykdysady forumyna gatnaşmak üçin türkmen wekiliýetine çakylyk ugratdy, şeýle hem türkmen tarapyny şu ýylyň güýzüne meýilleşdirilen ikinji Hazar ykdysady forumyna we Russiýanyň energetika forumyna gatnaşmaga çagyrdy.
ORIENT news
