Korrupsiýa garşy gözegçilik: ýolbaşçylar has düýpli barlanylar
Türkmenistanyň Maliýe we ykdysadyýet ministrligi döwlet wezipelerini eýeleýän ýolbaşçy adamlary barlamak boýunça gözegçilik çäreleriniň täze düzgünnamasyny işläp taýýarlady. Resminama Adalat ministrliginiň saýtynda ýerleşdirildi.
Düzgünnama ýolbaşçylar hem-de olaryň doga-garyndaşlary tarapyndan emläkleri satyn almak we satmak barada şertnamalar baglaşylanda korrupsiýa ýollaryny ýüze çykarmaga gönükdirilen barlaglaryň sanyny artdyrýar. Şeýle hem resminama degişli barlaglary geçirýän adamlaryň ygtyýarlyklaryny giňeldýär.
Barlaglaryň täze görnüşleri işewürligi hem-de ofşor hasaplary bolan wezipeli adamlary ýüze çykarmaga gönükdirilen täjirçilik amallaryna yzygiderli gözegçilik edilmegini özünde jemleýär.
Maý aýynyň başynda Prezident Serdar Berdimuhamedow harby we hukuk goraýjy edaralaryň ýolbaşçylaryna korrupsiýany ýok etmek üçin ähli tagallalary etmegi hem-de ýurdumyzyň kanunçylygyna degişli üýtgetmeleri we goşmaçalary girizmek boýunça teklipleri işläp taýýarlamagy tabşyrdy.
Şeýle tabşyrygy döwlet Baştutanymyz Baş prokuroryň Söwda we daşary ykdysady aragatnaşyklar ministrliginiň ulgamynda birnäçe korrupsiýa ýollarynyň ýüze çykarylandygy baradaky hasabatyndan soň berdi.
Täze düzgünnama bu hukuk düzgün bozmalara ýol berilmezligi boýunça çäreleriň ulgamyny kämilleşdirmäge hem-de jemgyýetde korrupsiýa garşy alnyp barylýan syýasatyň wezipelerine we talaplaryna agzybirlik bilen düşünilmegine gönükdirilendir.
ORIENT news
