Eýran türkmen gazyny Azerbaýjana çalyşmak üçin ibermegiň importyny iki esse artdyrar
Eýranyň we Azerbaýjanyň resmi adamlary özara düşünişmek hakynda Ähtnama gol çekdiler, şonuň çäklerinde tebigy gazyň Türkmenistan-Eýran-Azerbaýjan ugry boýunça çalşylyp ugradylyşyny iki esse artdyrmak ylalaşyldy diýip, IRNA habar berýär.
Çalşylyp ugradylmagy Türkmenistanyň gazy Eýrana ibermegini, ondan soňra bolsa EYR-synyň “mawy ýangyjyň” şonça möçberini Azerbaýjana eksport etmegini göz öňünde tutýar. Üstaşyr geçirilýän gazyň bir bölegi çalşylma üçin töleg hökmünde Eýranda galýar.
Özara düşünişmek hakynda Ähtnama Eýranyň nebit ministri Jawad Oji hem-de Azerbaýjanyň ykdysadyýet ministri Mikail Jabbarow anna güni Baku Energy Week çäresinde gol çekdiler.
Şu ýylyň bäş aýynda Azerbaýjan Türkmen gazynyň Eýranyň üsti bilen çalşylyp iberilmegi baradaky ylalaşyk boýunça 1,5 milliard kubmetr tebigy gazy import etdi. Şeýlelik bilen, taraplar “mawy ýangyjy” ýylyň dowamynda çalyşmagy ylalalaşdylar, ýöne anyk işleriň görkezişi ýaly, çalşylyp iberilmegi üçin islegler we tehniki mümkinçilikler garaşylyşyndan ýokary boldy.
Ozal Eýranyň nebit ministri Türkmenistan-Eýran-Azerbaýjan ugry boýunça gazyň çalşylyp ugradylyşyny bir ýylda 15 milliard kubmetre çenli artdyrmak üçin şertleriň bardygyny aýtdy. Bu bolsa Azerbaýjanyň türkmen gazyny import etmegiň möçberi boýunça Hytaýdan soň, ikinji orunda durmagyna getirip bilerdi.
ORIENT news
