Eýran türkmen gazyny Ermenistana çalyşmak ulgamy boýunça geçirmäge taýýar
Eýranyň Ermenistandaky ilçisi Abbas Badahşan Zohuri ýakyn wagtda Eýran bilen Ermenistanyň arasynda gazy çalyşmak görnüşinde täze hyzmatdaşlygyň başlamak mümkiniçiligi bar diýip hasaplaýar. Bu barada “Armenpress” agentligi habar berýär.
“Tehniki we hünär ugurly meseleler bolup, olar degişli hünärmenler tarapyndan öwrenilýär hem-de maslahatlaşylýar. Bu işler tamamlanmanka bir zatlar barada aýtmak dogry bolmaz. Netijelere garaşalyň, netije nähili bolsa-da, ol iki ýurt üçin hem bähbitli bolar” diýip, agentlik ilçiniň sözlerini getirýär.
Eýranyň Doly ygtyýarly wekili Ermenistanda geçirilen 17-nji ermeni-eýran hökümetara mejlisinde energetika ulgamyndaky ylalaşyklar ara alnyp maslahatlaşylan möhüm meseleleriň biri boldy, şol meseleleriň bir bölegi gazy çalyşmaga degişli boldy diýip, sözüniň üstüni ýetirdi.
Eýranyň nebir ministri Jawad Oji ýurdunyň türkmen gazyny Ermenistana çalyşmak ulgamy boýunça geçirmäge taýýardygyny aýdyp, Türkmenistandan Ermenistana gazy geçirmek baradaky gepleşikleriň eýýäm başlanandygyny belledi.
2004-nji ýylda Ermenistan we Eýran gazy elektrik energiýa çalyşmak hakynda Ylalaşyga gol çekdiler. Şol ylalaşyk gazy Ermenistana 20 ýylyň dowamynda eksport etmäge Eýrana mümkinçilik berýär, onuň ýerine bolsa Eýran Ermenistandan elektrik energiýasyny alýar.
Türkmenistan tebigy gazyň gory boýunça Russiýa, Eýran we Katar bilen bir hatarda, dünýä ýurtlarynyň ilkinji dörtlügine girýär.
Nury AMANOW
