Aşgabadyň gazna bazarynda 50 million manatdan gowrak paýnamalar satyldy
Maýadarlar Aşgabat gazna bazarynda umumy bahasy 50 079 537 manat bolan paýnamalaryň 1,2 milliondan gowragyny satyn aldylar diýilip, AGB-niň saýtynda habar berilýär.
2022-nji ýylyň ýanwar-maý aýlarynda satylan gymmatly kagyzlaryň bahasy 39 835 100 manada deň boldy. Bu bolsa tutuş 2021-nji ýyldaky bilen deňeşdirilende 3,7 esse köpdür.
Häzirki wagtda “Halkbank” bankynyň 8 müňden gowrak paýnamasy, “Rysgal” bankynyň 5,5 müň paýnamasy we “Senagat” bankynyň milliondan gowrak paýnamalary dolanyşykdadyr.
“Halkbankyň” bir paýnamasynyň bellenen bahasy 303 manada, “Rysgal” bankyň bir paýnamasynyň bellenen bahasy – 5250 manada, “Senagat” bankynyň bir paýnamasynyň bellenen bahasy – 20 manada deňdir. “Rysgal” bankynyň paýnamasynyň bellenen bahasy şu ýyl 2,5 esse artdy.
Aşgabat gazna bazarynda söwdalaryň jemi 33-si geçirilip, şolarda 61 geleşik bellige alyndy.
Soňky wagtlarda Türkmenistanyň Maliýe we ykdysadyýet ministrligi tejribe alyşmak hem-de milli gymmatly kagyzlar bazaryny ösdürmek maksady bilen, daşary ýurtlaryň wekilleri bilen hyzmatdaşlygy işjeňleşdirmäge gönükdirilen ençeme duşuşyklary geçirdi.
Şeýle hem dürli guramalar, şol sanda USAID bilen hyzmatdaşlykda Türkmenistanyň degişli ugurlardaky hünärmenleri tarapyndan gymmatly kagyzlar bazaryny ösdürmegiň Ýol kartasynyň taýýarlanylýandygy mälimdir.
ORIENT news
