Daşoguz welaýatynda köpugurly we onkologiýa hassahanalary açyldy
Daşoguz welaýatynyň dolandyryş merkezinde Prezident Serdar Berdimuhamedowyň gatnaşmagynda täze lukmançylyk desgalarynyň – Daşoguz welaýat köpugurly hem-de onkologiýa hassahanalarynyň açylyş dabarasy boldy – diýip, Türkmenistanyň resmi metbugaty habar berýär.
450 orunlyk köpugurly hassahana 8 bölümden ybarat bolup, näsaglary gyssagly ýetirmek üçin dikuçar meýdançasy bilen üpjün edilendir.
Täze hassahana ýürek-damar ulgamynyň, öýken we dem alyş ýollarynyň, peşew ulgamynyň kesellerini bejermek üçin zerur bolan enjamlar bilen enjamlaşdyrylandyr.
6 gatdan ybarat 150 orunlyk onkologiýa hassahanasynda ambulatoriýa–öňüni alyş, palliatiw terapiýasy, umumy onkologiýa, kliniki-dispanser gözegçiligi we radiologiýa, gematologiýa hem-de himioterapiýa bölümleri bar.
Lukmançylyk desgalarynyň ikisi-de Görogly köçesiniň ugrunda “Ajaýyp gurluşyk” hususy kärhanasy tarapyndan bina edilendir.
Ozal Daşoguzda anyklaýyş merkezi, Gaýragoýulmasyz tiz kömek merkezi, Enäniň we çaganyň saglygyny goraýyş ylmy-kliniki merkezi ýaly döwrebap saglygy goraýyş edaralary gurlup, ulanmaga berlipdi.
ORIENT news
