Türkmen babadaýhanlary 3-nji iýunda bugdaý oragyna girişerler
Türkmenistanda 3-nji iýunda bugdaý oragyna badalga berilýär. Şol gün Ahal, Lebap we Mary welaýatlarynda galla oragy möwsümi başlanar. Bir hepdeden, 10-njy iýunda, köpçülikleýin oraga ýurdumyzyň günbatar we demirgazyk sebitleri – Balkan we Daşoguz welaýatlary hem goşular.
Bu oba hojalyk möwsümine başlamagyň möhletlerini hormatly Prezidentimiz Serdar Berdimuhamedow Daşoguzda Hökümetiň göçme mejlisinde yglan etdi. Şonda sebitiň durmuş-ykdysady taýdan ösdürmegiň möhüm meselelerine-de garaldy.
Döwlet Baştutanymyz ösdürilip ýetişdirilen bugdaý däneleriniň ýitgisiz ýygnalyp alynmagynyň ýurdumyzyň azyk garaşsyzlygyny pugtalandyrmagyň girewidigini belledi hem-de ekerançylara berk jan saglyk, abadançylyk we bereketli hasyl almagy arzuw etdi.
ORIENT news
