Pekinde Hytaý bilen Russiýanyň strategik hyzmatdaşlygynyň geljegi ara alnyp maslahatlaşyldy

Halkara ýagdaýynyň üýtgeýän şertlerinde döwletleriň arasyndaky strategik dialog aýratyn ähmiýete eýe bolýar. Ýokary derejedäki harby duşuşyklar howpsuzlyk we sebit durnuklylygy bilen bagly meseleleri ara alyp maslahatlaşmagyň möhüm mümkinçilikleriniň biridir.

3-nji noýabrda Pekinde Hytaýyň Merkezi harby geňeşiniň başlygynyň orunbasary Çžan Şenmin Russiýanyň goranmak ministri Andreý Belousow bilen duşuşdy. Duşuşygyň dowamynda Çžan Şenmin Hytaýyň Russiýa bilen strategik aragatnaşyklary yzygiderli berkitmäge taýýardygyny aýtdy.

Ol iki ýurduň özygtyýarlylygyny, howpsuzlygyny we ösüş bähbitlerini has netijeli goramagyň, şeýle hem dünýäde we sebitlerde parahatçylygy hem-de durnuklylygy üpjün etmegiň möhümdigini belledi.

Andreý Belousow öz gezeginde Russiýanyň Hytaý bilen ýakyn utgaşykly hereketleri dowam etdirmäge we strategik maslahatlaşyklary güýçlendirmäge taýýardygyny mälim etdi.

Şeýle hem ol özara goldawy berkitmegiň, dürli ugurlarda amaly hyzmatdaşlygy giňeltmegiň hem-de iki döwletiň we olaryň ýaragly güýçleriniň arasyndaky gatnaşyklary ösdürmekde täze netijeleri gazanmagyň zerurdygyny nygtady.

Taraplar ikitaraplaýyn utgaşykly hereketleri dowam etdirmek we harby hyzmatdaşlygy ösdürmek meselelerine üns berdiler.

SSTV+-niň habar bermegine görä, Pekinde geçirilen duşuşykda Hytaýyň we Russiýanyň ýokary derejeli harby wekilleri strategik dialogy berkitmäge, amaly hyzmatdaşlygy giňeltmäge we howpsuzlyk meseleleri boýunça ýakyn utgaşykly hereketleri dowam etdirmäge taýýardyklaryny beýan etdiler.