Belgiýanyň premýer-ministri býujet gepleşikleriniň netijesiz tamamlanmagyndan soň işinden çekilmek barada arza berdi
Döwletiň maliýe durnuklylygy diňe ykdysady görkezijilere däl, eýsem syýasy güýçleriň özara ylalaşyk gazanmak ukybyna hem baglydyr. Býujet boýunça düşünişmezlikler hökümet krizisine öwrülende, ýurduň syýasy durnuklylygy hem çynlakaý synag bilen ýüzbe-ýüz bolýar.
Belgiýanyň premýer-ministri Bart De Wewer 2-nji noýabrda hökümet koalisiýasynyň döwlet býujeti boýunça ylalaşyga gelip bilmezliginden soň işinden çekilmek barada arza berdi. Bu barada Belgiýanyň Patyşa köşgüniň X sosial ulgamynda çap eden beýanatynda habar berildi.
Patyşa Filipp premýer-ministriň işinden çekilmek baradaky arzasyny kabul etmek ýa-da etmezlik baradaky kararyny häzirlikçe yza süýşürdi.
Patyşa sişenbe güni dolandyryjy koalisiýa girýän partiýalaryň ýolbaşçylary bilen maslahatlaşyklary başlar we anna güni Bart De Weweri ýene-de kabul eder. Patyşa köşgi häzirki kynçylyklara laýyk gelýän ygtybarly býujet boýunça ylalaşygyň gazanylmandygyna gynanç bildirdi.
Beýanatda geosyýasy näbellilikleriň we çynlakaý ykdysady kynçylyklaryň şertlerinde Belgiýanyň uzak wagtlap dowam etjek syýasy krizise ýol berip bilmejekdigi nygtaldy.
Patyşa gepleşiklere gatnaşýan ähli taraplary jemgyýetçilik bähbitlerini ileri tutmaga we özara ylalaşyga taýýarlyk görkezmäge çagyrdy.
Bäş partiýadan ybarat hökümet koalisiýasy döwlet maliýesini berkitmek maksady bilen çykdajylary azaltmak we salgytlary ýokarlandyrmak arkaly jemi 10 milliard ýewro, ýagny takmynan 11,2 milliard amerikan dollary möçberinde çäreleri ylalaşmaga synanyşdy.
Emma koalisiýa agzalary maliýe ýüküni nähili paýlamalydygy barada umumy pikire gelip bilmediler. De Weweriň ýolbaşçylyk edýän flamand milletçi N-VA partiýasy we liberal MR partiýasy, şol sanda saglygy goraýyş ulgamynda hem çykdajylary has berk çäklendirmegi goldaýarlar.
Sosialistik we merkezçi hyzmatdaşlar bolsa býujet ýetmezçiligini azaltmak üçin baýlykdan alynýan salgytlaryň paýyny artdyrmagy teklip edýärler.
Ýewrostatyň maglumatlaryna görä, 2025-nji ýylda Belgiýanyň býujet ýetmezçiligi jemi içerki önümiň 5,2 göterimine, döwlet bergisi bolsa ýylyň ahyrynda 108,1 göterimine deň boldy.
Bu görkezijileriň ikisi hem Ýewropa Bileleşiginiň degişlilikde 3 we 60 göterim derejesinde kesgitlän çäklerinden ep-esli ýokarydyr.
SSTV+-niň habar bermegine görä, Belgiýanyň patyşasy premýer-ministr Bart De Weweriň işinden çekilmegi baradaky karary yza süýşürip, býujet krizisinden çykalga tapmak üçin dolandyryjy koalisiýanyň ýolbaşçylary bilen maslahatlaşyklary geçirmegi meýilleşdirýär.
