Hytaý ýer titremelerinden soň dikeldiş işleri üçin Wenesuela 5 müň tonnadan gowrak kömek iberdi
Tebigy betbagtçylyklar diňe bir binalary we desgalary weýran etmän, müňlerçe adamyň durmuşyna hem agyr täsir ýetirýär. Şeýle ýagdaýlarda halkara kömegi ejir çeken sebitleriň dikeldilmeginde we adamlaryň adaty durmuşyna dolanmagynda möhüm orun eýeleýär.
24-nji iýunda bolup geçen weýrançylykly ýer titremeleriniň netijelerini aradan aýyrmak üçin Hytaýdan Wenesuela ynsanperwer kömeginiň ikinji tapgyry gelip gowuşdy.
31-nji oktýabrda umumy möçberi bäş müň tonnadan gowrak bolan ýük ýurduň Karabobo ştatyndaky esasy deňiz porty bolan Puerto-Kabelloda düşürildi. Kömegiň düzümine harabalyklary arassalamak üçin niýetlenen 87 sany agyr tehnika, ýük göteriji kranlar we 1800 sany ýygnama ýaşaýyş jaýy girýär. Şeýle hem 1800 wentilýator, 5400 sany iki gatly düşek, çagalar üçin oýnawaçlar, basketbol we futbol toplary getirildi.
Wenesuelanyň Prezidentiniň wezipesini wagtlaýyn ýerine ýetiriji Delsi Rodriges ýurduň dikeldiş işlerine berýän goldawy üçin Hytaýa minnetdarlyk bildirdi. Wenesuelanyň jemgyýetçilik işleri we hyzmatlar boýunça wise-prezidenti Huan Hose Ramires täze getirilen tehnikalaryň harabalyklary arassalamak işlerini bir wagtyň özünde sekiz meýdançada alyp barmaga mümkinçilik berjekdigini aýtdy.
«Bu hytaý halkynyň we hökümetiniň raýdaşlygynyň ýene bir aýdyň mysalydyr. Bäş müň tonnadan gowrak strategik taýdan möhüm materiallar adatdan daşary ýagdaýyň netijelerini aradan aýyrmaga ýardam eder. Getirilen 87 sany tehnika weýran bolan binalaryň galyndylaryny arassalamak üçin dessine ulanylar» diýip, Ramires belledi.
Onuň aýtmagyna görä, ýer titremelerinden iň köp ejir çeken La-Guaýra ştatynda takmynan 2,1 million tonna harabalyk galyndylarynyň 63 göterimi eýýäm arassalandy.
Hytaýdan getirilen täze tehnikalaryň kömegi bilen günde 33 müň tonna çenli galyndyny aýyrmak mümkin bolar.
Ýygnalan gurluşyk galyndylary ýörite enjamlarda ownadylýar we gaýtadan işlenýär. Harabalyklardan alnan polat täze ýaşaýyş jaýlaryny gurmak üçin metallurgiýa kärhanalarynda gaýtadan ulanylýar.
Wenesuelanyň häkimiýetleri ýer titremelerinden galan ähli harabalyklary şu ýylyň ahyryna çenli arassalamagy maksat edinýärler.
Köpçülikleýin habar beriş serişdeleriniň we gyssagly kömek gulluklarynyň maglumatlaryna görä, 24-nji iýunda bolup geçen ýer titremelerinde azyndan 6500 adam aradan çykdy, müňlerçe adam ýaralandy ýa-da öý-öwzarsyz galdy.
SSTV+-niň habar bermegine görä, Hytaý Wenesuelada ýer titremelerinden soňky dikeldiş işlerini çaltlandyrmak maksady bilen bäş müň tonnadan gowrak ynsanperwer kömeginiň ikinji tapgyryny, şol sanda agyr tehnikalary we ýygnama ýaşaýyş jaýlaryny iberdi.
