Türkmenistanyň Mejlisiniň Başlygy Duşenbe şäherinde geçirilen Parlamentara forumyna gatnaşdy
Türkmenistanyň Mejlisiniň Başlygy Dünýägözel Gulmanowa 29-njy oktýabrda Duşenbe şäherinde «Parahatçylygyň, howpsuzlygyň we abadançylygyň hatyrasyna jebislik» şygary astynda geçirilen Merkezi Aziýa döwletleriniň IV Parlamentara forumynda milli wekiliýete ýolbaşçylyk etdi.
Saparyň maksatnamasy forumyň umumy mejlislerindäki çekişmelere gatnaşmagy, şeýle hem Täjigistan Respublikasynyň ýokary kanun çykaryjy edarasynyň ýolbaşçylary bilen ikitaraplaýyn gepleşikleri öz içine aldy.
Köptaraplaýyn dialogyň dowamynda oňa gatnaşyjylar sebit durnuklylygyny, hoşniýetli goňşuçylygy we durnukly ösüşi berkitmegiň esasy ugurlaryna garadylar. Türkmen tarapy Aşgabadyň netijeli döwletara dialogy ösdürmäge hem-de Merkezi Aziýanyň ähli halklarynyň bähbidine gönükdirilen bilelikdäki başlangyçlary öňe sürmäge üýtgewsiz ygrarlydygyny tassyklady.
Parlament diplomatiýasynyň amaly ugurlary Dünýägözel Gulmanowanyň Täjigistanyň Oli Majlisiniň Milli Majlisiniň Başlygy Rustam Emomali we Namoýandagon Majlisiniň Başlygy Faýzali Idizoda bilen bolan duşuşyklarynda ara alnyp maslahatlaşyldy. Söhbetdeşler iki ýurduň ýokary ýolbaşçylarynyň türkmen-täjik gatnaşyklaryny yzygiderli ösdürmäge goşan aýratyn goşandyny nygtadylar we Parlamentara dostluk toparynyň işini işjeňleşdirmegiň tarapdary bolup çykyş etdiler.
Türkmen tarapy täjik kärdeşlerini Aşgabatda geçiriljek halkara forumlara, şol sanda ÝHHG-nyň çäklerinde parlament diplomatiýasy boýunça ýöriteleşdirilen maslahata hem-de Türkmenistanyň GDA-da başlyklyk etmeginiň çäklerindäki çärelere gatnaşmaga çagyrdy.
