Ženewadaky BMG-niň Milletler köşgünde täzelenen Türkmen zaly açyldy
Ženewa şäherinde 1930-njy ýyllarda Milletler Ligasynyň zerurlyklary üçin gurlan taryhy Milletler köşgüniň binasynda Açyk gapylar gününiň çäklerinde täzelenen Türkmen zalynyň dabaraly tanyşdyrylyşy geçirildi. BMG-niň mirasy gorap saklamak boýunça strategik meýilnamasynyň (SHP) howandarlygynda geçirilen bu giň gerimli çärä BMG-niň Ženewadaky bölüminiň baş direktory Tatýana Walowaýa, diplomatik wekilhanalaryň ýolbaşçylary, halkara bilermenler hem-de Türkmenistanyň Hemişelik wekilhanasynyň wekilleri gatnaşdylar.
2014-nji ýylda Türkmenistanyň Hökümetiniň goldawy bilen ilkinji gezek giň gerimli dikeldiş işleri geçirilen taryhy Türkmen zaly SHP-niň häzirki tapgyrynyň çäklerinde döwrebap, ýokary tehnologiýaly enjamlar bilen täzeden enjamlaşdyryldy. Şol bir wagtyň özünde hünärmenler otagyň taryhy özboluşly keşbini kämil derejede gorap saklamagy başardylar. Zalyň içki bezeginiň esasy aýratynlygy bolan täsin gadymy mebel önümleri we elde dokalan halyçylyk sungatynyň ajaýyp nusgalary öňküsi ýaly özboluşlylygyny saklady. Açyk gapylar gününiň myhmanlary türkmen ekspozisiýasy bilen bir hatarda Geňeş zalynyň, Fransuz, Rus we Çeh-Slowak zallarynyň bezeg aýratynlyklary bilen hem tanyşmaga mümkinçilik aldylar.
Täzelenen zal ýokary derejedäki gepleşikleri geçirmek, halkara araçylygy we köptaraplaýyn diplomatiýany ösdürmek üçin abraýly meýdança hökmünde hyzmat etmegini dowam etdirýär. Bu taslama Türkmenistanyň Birleşen Milletler Guramasy bilen berk strategik hyzmatdaşlygynyň aýdyň beýanyna, şeýle hem milli medeniýetleriň dünýä derejesinde özara hormat we aýawlylyk esasynda dialog alyp barmagynyň görnükli nusgasyna öwrüldi.
