Ýewropada tebigy gazyň bahasy 2022-nji ýylyň dekabryndan bäri iň ýokary derejä ýetdi
Duşenbe güni Ýewropada tebigy gazyň bahasy bir megawatt-sagat üçin 97 ýewro (108 ABŞ dollary) çenli ýokarlandy. Bu görkeziji 2022-nji ýylyň dekabryndan bäri hasaba alnan iň ýokary derejedir. Bahalaryň ýokarlanmagyna gyş möwsüminiň öňüsyrasynda energiýa serişdeleriniň üpjünçiliginiň çäkliligi we Ýakyn Gündogarda dowam edýän konflikt sebäp boldy.
Şu ýylyň fewral aýynda Eýranda uruş başlanmazdan ozal Ýewropada gazyň bahasy bir megawatt-sagat üçin takmynan 32 ýewro (36 ABŞ dollary) bolupdy. Oktýabr aýynyň başynda bolsa bahalar heniz 75 ýewrodan (84 ABŞ dollaryndan) pesdi.
Ýewropanyň gaz ammarlary hem basyş astynda galýar. Häzirki wagtda olaryň doldurylma derejesi takmynan 75 göterime deň bolup, degişli döwür üçin ortaça 80 göterimlik görkezijiden pesdir. Bu 2009-njy ýylda degişli statistikanyň ýöredilip başlanmagyndan bäri ýylyň şu döwri üçin iň pes derejedir.
Ýewropa yklymynda howanyň sowamagy bilen, bazara gatnaşyjylar ýakyn günlerde ýyladyş üçin gaza bolan islegiň ep-esli artmagyna garaşýarlar.
CCTV+-nyň habar bermegine görä, gaz gorlarynyň çäkliligi, möwsümleýin islegiň ýokarlanmagy we Ýakyn Gündogardaky dartgynly ýagdaý Ýewropanyň energetika bazaryna düşýän basyşy güýçlendirýär. Gyş möwsüminiň öňüsyrasynda gaz ammarlarynyň ýeterlik derejesi we üpjünçiligiň durnuklylygy bahalaryň üýtgemegine täsir edýän esasy ýagdaýlar bolup galýar.
