Türkmenistanyň Prezidentiniň bitaraplyk baradaky kitabynyň azerbaýjan dilindäki neşiri tanyşdyryldy
Türkmenistanyň Daşary işler ministrliginiň Halkara gatnaşyklary institutynda Türkmenistanyň Prezidenti Serdar Berdimuhamedowyň azerbaýjan dilinde neşir edilen «Türkmenistanyň Bitaraplygy — parahatçylygyň we ynanyşmagyň aýdyň ýoly» atly kitabynyň dabaraly tanyşdyrylyş çäresi geçirildi.
Çärä Türkmenistanyň Daşary işler ministriniň orunbasary Mähri Bäşimowa, Azerbaýjanyň Türkmenistandaky ilçisi Gismat Gozalow, diplomatik korpusyň wekilleri, alymlar we halkara gatnaşyklary boýunça geljekki hünärmenler gatnaşdylar.
Tanyşdyrylyş dabarasynda eden çykyşynda Türkmenistanyň Daşary işler ministriniň orunbasary Mähri Bäşimowa we ilçi Gismat Gozalow bu eseriň ýurduň bitaraplyk derejesiniň parahatçylyk söýüji filosofiýasyny we onuň halkara durnuklylygyny pugtalandyrmakdaky ornuny açyp görkezýän düýpli ylmy çeşmedigini nygtadylar.
Kitabyň azerbaýjan dilinde neşir edilmegi doganlyk döwletleriň arasynda medeni-ynsanperwer dialoga bildirilýän çuňňur hormatyň we bu ugurdaky gatnaşyklaryň yzygiderli ösdürilýändiginiň aýdyň subutnamasy boldy.
Türkmenistanyň Daşary işler ministrliginiň Halkara gatnaşyklary institutynyň, Ylymlar akademiýasynyň we Magtymguly adyndaky Türkmen döwlet uniwersitetiniň professor-mugallymlar düzüminiň wekilleri neşiriň degişli ugurlar boýunça hünärmenler üçin ýokary ylmy-usuly ähmiýetini bellediler. Azerbaýjanly hünärmenler tarapyndan terjime edilen kitap doganlyk ýurduň giň okyjylar köpçüligine Türkmenistanyň daşary syýasatynyň esasy ileri tutulýan ugurlary, öňüni alyş diplomatiýasy we onuň binýadyny düzýän özara hormat goýmak ýörelgeleri bilen giňişleýin tanyşmaga mümkinçilik berer.
